ДУШАНБЕ, 3 июл — Sputnik. Пас аз анҷоми мулоқоту музокироти раисҷумҳури Тоҷикистон ва сарвазири Покистон маросими имзои санадҳои нави ҳамкорӣ баргузор гардид.
Ба иттилои дафтари матбуоти раисҷумҳур миёни ду кишвар 9 санади муҳим ба имзо расид.
Эмомалӣ Раҳмон ва Шаҳбоз Шариф ба Изҳороти муштарак байни Тоҷикистон ва Покистон аз натиҷаи сафари расмии Сарвазири Покистон ба Тоҷикистон ва Созишномаи шарикии стратегӣ байни Тоҷикистон ва Покистон имзо гузоштанд.
Ҳамчунин, санадҳои зерин ба имзо расид:
Барномаи ҳамкорӣ байни Вазорати корҳои хориҷии Тоҷикистон ва Вазорати корҳои хориҷии Покистон барои солҳои 2025-2026;
Протоколи нияти ҳамкорӣ байни Вазорати саноат ва технологияҳои нави Тоҷикистон ва Вазорати федералии корҳои баҳрии Покистон дар бораи густариши ҳамкорӣ дар содирот ва воридоти молҳо ва маҳсулоти саноатӣ;
Созишнома оид ба ҳамкории илмӣ байни Академияи миллии илмҳои Тоҷикистон ва Академияи илмҳои Покистон;
Харитаи роҳ байни Кумитаи рушди сайёҳии Тоҷикистон ва Корпоратсияи рушди сайёҳии Покистон;
Ёддошти тафоҳуми иловагӣ байни Агентии авиатсияи граждании Тоҷикистон ва Маъмурияти авиатсияи граждании Покистон оид ба хизматрасонии алоқаи ҳавоӣ;
Ёддошти тафоҳум миёни Донишгоҳи миллии Тоҷикистон (Душанбе, Тоҷикистон) ва Донишгоҳи Панҷоб (Лаҳор, Покистон);
Ёддошти тафоҳум оид ба ҳамкорӣ байни Федератсияи крикети Тоҷикистон ва Шурои крикети Покистон.
Кишвардори Тоҷикистон зимни нишасти матбуотӣ пас аз имзои санадҳо гуфт, ки имзои санадҳои нави ҳамкороӣ заминаи ҳуқуқии муносибатҳои байнидавлатии ду кишварро тақвият мебахшанд.
“Бахусус, мехоҳам аҳаммияти таърихии Созишнома дар бораи шарикии стратегиро таъкид намоям. Бовар дорам, ки сатҳи сифатан нави робитаҳои ду ҷониб омили рушди самарабахши онҳо дар ҳамаи самтҳои ҳамкорӣ хоҳад гардид”, гуфт Раҳмон.
Раҳбари Тоҷикистон илова кард, ки ҳамкории фарогир ва созанда комилан ҷавобгӯи манфиатҳои дарозмуддати мардумони ду кишвар мебошад.