ДУШАНБЕ, 2 апр — Sputnik. Нархи рубл дар Тоҷикистон боло рафта, феълан ҳазор рубл ба 118,9 сомонӣ баробар шудааст, ки нисбати нишондоди рӯзи қабл каме боло рафтаст.
Дар ин бора Бонки миллии Тоҷикистон бо нашри як арзнома иттилоъ додаст.
Ба иттилои манбаъ, нархи пули амрикоӣ ва аврупоӣ поин рафта, феълан доллари ИМА - 10,9511 сомонӣ ва евро - 11,8173 сомонӣ нарх дорад.
Дар бозори нақди Тоҷикистон нархи миёнаи харидуфурӯш 1 доллари ИМА аз 10.9511 то 10.9800 сомонӣ, 1 евро аз 11.8173 то 11.9600 сомонӣ ва ҳазор рубли русӣ аз 118,7 то 120,5 сомониро ташкил медиҳад.
Рубл дар Тоҷикистон яке аз сертаваҷҷуҳтарин асъор ба шумор меравад ва қимати он ба пул дар кисаи аҳолии кишвар таъсири бевосита дорад.
Аз ҷумла садҳо ҳазор тоҷикистонӣ дар Русия кор мекунанд ва маблағро бо рубл мегиранду мефиристанд, аммо хонаводаҳояшон вобаста ба қурб онро бо сомонӣ мегиранд.
Дар ҳамин ҳол БМТ ҳушдор додаст, ки берун аз сарбонк, филиал, марказҳои хизматрасонии бонкӣ, нуқтаи интиқоли пул ва банкомату терминалҳо анҷом додани амалиёти мубодилавӣ қатъиян манъ аст.
Таъкид шудаст, ки риоя накардани талаботи мазкур аз ҷониби шахсони воқеӣ қонуншиканӣ ба ҳисоб рафта, ҷавобгарии маъмурӣ ва ҷиноятӣ дар пай дорад.