ДУШАНБЕ, 21 фев — Sputnik. Раисиҷумҳури Тоҷикистон Эмомалӣ Раҳмон барои ширкат дар ифтитоҳи мусобиқаи байналмилалии "Бозиҳои оянда" ба Қазон даъват шуд.
Дар ин бора дафтари матбуоти Кремл хабар медиҳад. Ба иттилои манбаъ, дар ин нишаст ҳамчунин раҳбарони Беларус Александр Лукашенко, Қирғизистон - Содир Ҷабборов, Қазоқистон - Қосим-Ҷомарт Тоқаев ва Ӯзбекистон - Шавкат Мирзиёев низ ширкат хоҳанд кард.
Маросими ифтитоҳи нахустин "Бозиҳои оянда" рӯзи 21 феврал дар Қазон баргузор мешавад ва интизор меравад, ки зӯрозмоиҳо то 3 март идома хоҳанд дошт.
Дар мусобиқа интизор меравад, ки намояндагони Тоҷикистон низ ширкат хоҳанд кард. Аз ҷумла дар зӯрозмоиҳои инфиродию гуруҳӣ ҷумҳуриро 35 варзишкор муаррифӣ мекунанд.
Онҳо дар панҷ намуд - омехта, барномасозии варзишӣ, Битсейбр ва Ҷастбенг рақобат хоҳанд кард.
Дар маҷмуъ зӯрозмоиҳо дар 21 самт бо истифода аз технологияҳои муосир, муҳити рақамӣ ва фаъолияти ҷисмонӣ гузаронида мешаванд. Ҳар яке аз онҳо мафҳуми “фиҷитал”, ҳамоиши ҷисмонию рақамиро фаро мегиранд.
Дар умум мусобиқа варзиши классикӣ ва киберспорт ё технологияи VR/AR-ро муттаҳид мекунад. Дар ин озмун ҳудуди 2 ҳазор нафар аз 107 кишвари ҷаҳон ширкат мекунанд.