ДУШАНБЕ, 14 фев – Sputnik. Протоколи мусоидати молиявӣ ба тарҳҳои муштараки саноатии кишварҳои узви Иттиҳоди иқтисодии Авруосиёро раисиҷумҳури Русия Владимир Путин имзо кард.
Бар асоси тартиби муқарарнамудаи санад, ҳаҷми маблағе, ки дар буҷети ИИАО барои дастгирии молиявии чунин лоиҳаҳои муштарак дар соли молиявии оянда равона мешавад, мутаносибан аз ҳаҷми умумии даромадҳо ба буҷети давлатҳои узви созмон аз боҷҳои махсус, зиддидемпингӣ ва ҷубронпулӣ дар соли гузашта муайян карда мешавад.
Андозаи ин ҳисса ва шакли кумаки молӣ ба тарҳҳои муштараки саноатӣ аз ҷониби Шӯрои олии иқтисодии АвруОсиё муайян карда мешавад.
Муовини вазири саноат ва савдои Русия Виктор Евтухов гуфт, интизор меравад, ки ҳаҷми кумаки молиявӣ 10% аз ҳаҷми умумии воридот аз чунин боҷҳоро ташкил диҳад. Ва кумаки молӣ дар шакли субсидияи фоизи қарз ва қарзҳои созмонҳои молии байналмилалӣ ва миллӣ ироа хоҳад шуд.
Тартиби интихоб ва татбиқи лоиҳаҳо, инчунин расонидани кӯмаки молиявӣ аз буҷети ИИАО дар низомномае, ки Шӯрои байниҳукуматии АвруОсиё тасдиқ мекунад, муайян карда мешавад.
Иҷрои протокол хароҷоти иловагиро ба бор меорад ва дар доираи маблағҳои буҷетие, ки дар буҷети федералӣ пешбинӣ шудааст, сурат мегирад, қайд кард Евтухов.
Интизор меравад, ки дар соли 2024 барои мусоидати молиявӣ дар тарҳҳои муштараки саноатии ИИАО 1,7 млрд рубл ихтисос дода шавад, ки ҳиссаи Русия ҳудуди 1,5 млрдро ташкил медиҳад, гуфт Евтухов.
Муовини вазир тавзеҳ дод, ки механизми кумаки молиявӣ барои панҷ сол аз рӯзи эътибор пайдо кардани протокол бо имкони тамдиди он пешбинӣ шудааст.