ДУШАНБЕ, 14 фев – Sputnik. Мактаби муҳоҷирон минбаъд дар бинои сафорати Афғонистон дар шаҳри Душанбе фаъолияти худро идома хоҳад дод.
Ба гуфтаи сафири Афғонистон дар Тоҷикистон, Муҳаммад Зоҳир Ағбар, чандин моҳ талош карданд, ки барои пардохти пули иҷораи мактаб як сармоягузор пайдо кунанд, аммо муваффақ нашуданд.
“Аз ин хотир, мо маҷбур шудем, ки мактаб ва мактабиёнро ба як қисмати бинои сафорати Афғонистон дар Душанбе мунтақил кунем”, - гуфт Зоҳир Ағбар ба Sputnik Тоҷикистон.
Мактаби “Сомониён” дар бинои ҷадиди худ – бинои сафорати Афғонистон дар Душанбе 14 феврал, фаъолияти худро аз сар гирифт.
Мактаби “Сомониён” ҳанӯз дар замони ҳукумати Бурҳонуддин Раббонӣ дар солҳои 1990 дар Душанбе эҷод шуда, дар он алъон 250 хонанда таҳсил мекунанд.
То суқути давлати ҷумҳурии Афғонистон дар 15 августи соли 2021 ба дасти Толибон* мактаб аз ҳисоби вазорати хориҷаи Афғонистон сармоягузорӣ мешуд.
Аз он ба баъд ҳаққи иҷораи мактабро, ки 2,5 ҳазор долларро ташкил медод, худи сафорати Афғонистон дар Тоҷикистон фароҳам мекард.
Дар мактаби мазкур аз ҷумла бо дастгирии намояндагии "Россотрудничество" таълими забони русӣ бо ҷалби мутахассисон татбиқ мегардад, ки мавриди таваҷҷуҳи муҳассилин қарор гирифтааст.
*-созмон барои фаъолияти террористӣ таҳти таҳримоти СММ қарор дорад