ДУШАНБЕ, 25 янв — Sputnik. Дар Маҷмааи тандурустии “Истиқлол” маросими тақдими як адад озмоишгоҳи микробиологӣ ва хаймаи озмоишгоҳи сайёр аз ҷониби Русия ба Вазорати тандурустӣ ва ҳифзи иҷтимоии аҳолии кишвар баргузор шуд.
Дар ин маросим муовини вазири тандурустӣ ва ҳифзи иҷтимоии аҳолӣ Абдухолиқ Амирзода, намояндагони Сафорати Русия дар Тоҷикистон иштирок доштанд.
Таъкид шудааст, ки дар дохили нақлиёт ва хаймаи озмоишгоҳи сайёр тамоми асбобу таҷҳизоти озмоишгоҳии муосир ва ҷавобгӯ ба талаботи замони муосир маҳайё гардида, онҳо барои пешбурди фаъолияти Муассисаи давлатии “Маркази ҷумҳуриявии мубориза бар зидди бемориҳои карантинӣ”-и Вазорати тандурустӣ ва ҳифзи иҷтимоии аҳолии мамлакат пешбинӣ гардидаанд.
Тавре зикр гардид, соли 2023 миёни Ҳукумати Тоҷикистон ва Ҳукумати Русия дар самти ҳифзи санитарию эпидемиологии аҳолӣ Созишнома ба имзо расонида шуд.
Ин кумакҳо низ тибқи банди дуюми созишномаи мазкур барои ҳамкориҳо дар самти пешгирии бемориҳои ниҳоят хавфнок ва ҳифзи санитарии худуди Тоҷикистон ва умуман ҳудуди Иттиҳоди давлатҳои Муштаракулманофеъ (ИДМ) пешниҳод карда шудаанд.