ДУШАНБЕ, 26 янв — Sputnik. Раиси суди ноҳияи Панҷ барои гирифтани 122 ҳазор сомонӣ дар чанд ҳолат гумонбар дониста мешавад, иттилоъ додааст сомонаи “Фараж” дар истинод ба раёсати Агентии назорати давлатии молиявӣ ва мубориза бо коррупсия дар вилояти Хатлон.
Ба иттилои манбаъ аз ниҳоди мазкур, боздошти раиси суди ноҳияи Панҷ нисфирӯзии 25-уми январ дар утоқи кориаш ба вуқуъ пайвастааст.
“Ӯро шаб дар боздоштгоҳи раёсати Агентии мазкур нигоҳ дошта, субҳи имрӯз ба шаҳри Душанбе интиқол доданд”, – иттилоъ додааст манбаъ.
Агентӣ кирдорҳои боздоштшударо бо моддаҳои “Гирифтани пора” ва “Сӯистифода аз ваколатҳои мансабӣ”-и Кодекси ҷиноятии ҶТ банду баст ва нисбаташ парвандаи ҷиноятӣ боз кардааст.
Ёдовар мешавем, ки тибқи қавонини Тоҷикистон ба мансабдорони давлатие, ки аз ҷониби суд дар гирифтани пора гунаҳгор дониста мешаванд, аз 5 то 10 сол, бидуни ҳақи ишғоли мансабҳои муайян ё машғул шудан ба фаъолияти муайян ба муҳлати аз 3 то 5 сол ва ҷарима ба андозаи аз 547 то 1092 нишондиҳанда ва ё маҳрум сохтан аз озодӣ ба муҳлати аз 3 то 6 сол, бидуни ишғоли мансабҳои муайян ё машғул шудан бо фаъолияти муайян ба муҳлати то 5 сол, ҷазо муқаррар кардааст.
Бояд қайд кард, ки як нишондиҳанда барои ҳисобҳо дар Тоҷикистон 72 сомониро ташкил медиҳад.
Раиси ҳамакнун собиқи суди ноҳияи Панҷи вилояти Хатлон соли 2018 ба вазифаи мазкур таъйин шуда буд.
Номбурда то он дам ба ҳайси судя дар суди ноҳияи Фирдавсии шаҳри Душанбе кор мекард.