ДУШАНБЕ, 9 янв — Sputnik. Тоҷикистону Эрон ёддошти тафоҳум дар бораи таъсиси Маркази инноватсионию технологиро ба имзо расонданд.
Санадро раиси шаҳри Душанбе, раиси Маҷлиси миллии Тоҷикистон Рустами Эмомалӣ ва ноиби президенти Эрон оид ба фанноварӣ ва иқтисоди донишбунён Руҳулло Деҳқонии Фирӯзободӣ имзо гузоштанд.
Дафтари матбуоти Маҷлиси миллӣ мегӯяд, ҳадафи ин иқдом рушди ҳамкориҳои илмию техникии байни Тоҷикистону Эрон ва пешбурди муносибатҳо дар соҳаи технологияҳо ва иқтисодиёти ба дониш асосёфта мебошад.
Дар доираи сафар Рустами Эмомалӣ ҳамчунин аз Хонаи навовариҳои технологии Эрон дар шаҳри Теҳрон боздид кад.
Ин марказест, ки дар он навтарин дастоварду маҳсулоти илмӣ ва нанотехнологии Эрон дар соҳаҳои гуногуни саноат, хӯрокворӣ, кишоварзӣ, дорусозӣ, таҷҳизоти тиббӣ, вояҳои чорво ва парранда, доруҳои растанӣ ва ғайраҳо ба намоиш гузошта шудааст, иттилоъ дод Маҷлиси миллӣ.
Манбаъ афзуд, ки Хонаи навовариҳои технологии Эрон бо мақсади васеъ кардани содироти маҳсулоти илмӣ ва рушди ҳамкориҳои муштараки илмию техникии байни Эрон ва кишварҳои хориҷӣ бо ниҳодҳои давлативу илмии хориҷӣ ҳамкорӣ менамояд.