ДУШАНБЕ, 7 дек — Sputnik. Тоҷикистон, Покистон ва Қирғизистон қасд доранд, иҷрои тарҳи энержии CASA-1000-ро суръат бахшанд.
Ҷонибҳо дар доираи Конфронси 28-уми ҷонибҳои Конвенсияи чаҳорчӯбаи СММ оид ба тағирёбии иқлим изҳороти дахлдор ба имзо расониданд.
Вазирони энергетикаи кишварҳои ширкаткунандаи лоиҳа қайд карданд, ки CASA-1000 дар марҳилаи ниҳоии худ қарор дорад.
"Тарафҳо омодагии дастаҷамъонаи худро барои ҳарчӣ зудтар оғоз намудани истифодаи тиҷоратии лоиҳа изҳор намуданд", - таъкид кардааст Вазорати энергетикаи Тоҷикистон.
Намояндагони давлатҳо ҳамчунин қайд карданд, ки ин иқдом на танҳо сатҳи зиндагии сокинони маҳалро беҳтар мекунад, балки дар мубориза бо тағйири иқлим низ саҳми арзанда хоҳад гузошт.
Маблағи умумии лоиҳаи CASA-1000 1,2 миллиард долларро ташкил медиҳад, гуфт Вазорати энергетикаи ҷумҳурӣ.
Лоиҳаи минтақавии CASA-1000 пайвастани системаҳои энергетикии Осиёи Марказӣ ва Ҷанубӣ, аз ҷумла Тоҷикистон ва Қирғизистон бо Афғонистон ва Покистонро барои содироти нерӯи барқ дар назар дорад.
Музокирот оид ба ин ташаббус аз соли 2007 идома дорад. Дар соли 2008 намояндагони чаҳор кишвар дастури асосноккунии техникию иқтисодии ин лоиҳаро доданд. Таҳияи асосҳои техникӣ-иқтисодӣ соли 2011 анҷом ёфт.
Ҳамин тариқ, Қирғизистон дар чаҳорчӯби CASA-1000 ӯҳдадор шуд, ки 40% интиқоли нерӯи барқро ба Осиёи Ҷанубӣ бигирад. Тоҷикистон омода аст 60% боқимондаро диҳад.
Татбиқи ин тарҳ дар Афғонистон, ки танҳо як хати интиқоли барқ дорад, бинобар иваз шудани ҳукумат дар ин кишвар дар моҳи августи соли 2021 мутаваққиф шуда буд.
Қаблан Вазорати энержии Тоҷикистон хабар дода буд, ки тарҳи CASA-1000 дар тӯли ду сол ба нақша гирифта шуда, тасмим дар бораи анҷоми сохтмон дар Афғонистон то охири соли 2023 дар назар аст.