ДУШАНБЕ, 9 ноя — Sputnik. Президенти Тоҷикистон, Эмомалӣ Раҳмон ва Раиси Ҷумҳурии Исломии Эрон Иброҳими Раисӣ дар ҳамоиши иқтисодӣ, сармоягузорӣ ва соҳибкорони ду кишвар иштироку суханронӣ намуданд.
Эмомалӣ Раҳмон ҳамоишро барои мубодилаи афкор ва таҷриба, баррасии имкониятҳои мавҷуда ва тавсеаи ҳамкориҳои судманди ду кишвар муҳим арзёбӣ карданд.
Ба иттилои дафтари матбуоти президенти Тоҷикистон, Раҳмон таъкид намуд, ки таҳкиму тавсеаи ҳамкориҳои тиҷоративу иқтисодӣ ва сармоягузорӣ аз самтҳои муҳими муносибатҳои ду кишвар ба шумор мераванд.
Вай гуфт, ҳукумати Тоҷикистон таъмин намудани пешрафти бахши хусусӣ тавассути ҷалби сармоя эътибори махсус зоҳир намуда, онро яке аз ҳадафҳои сиёсати иқтисодии худ эътироф кардааст.
"Тибқи қонунгузориҳои кишвар, барои сармоягузорону соҳибкорон беш аз 240 номгӯйи кафолату имтиёзҳо, аз ҷумла зиёда аз 110 имтиёзу сабукиҳо дар самтҳои андозу гумрук пешбинӣ шудааст", - зикр намуд Раҳмон.
Вай сарватҳои фаровони табиӣ, махсусан захираҳои обу маъданро муаррифӣ намуда, ба истифодаи босамари иқтидорҳои соҳаи гидроэнергетика ва сармоягузорӣ ба ин самт таваҷҷуҳ намуд.
Президенти Тоҷикистон гуфт, зарфияти бузурги ҳамкорӣ дар саноати маъдан, металлургӣ, кимиё, истеҳсоли масолеҳи сохтмон, саноати сабук, хӯрокворӣ, дорусозӣ, кишоварзӣ, нақлиёт ва сайёҳӣ мавҷуд мебошад.