ДУШАНБЕ, 8 ноя — Sputnik. Ҷаласаи гурӯҳҳои кории байниҳукуматии Тоҷикистону Қирғизистон оид ба таъйин ва аломатгузории марзи муштарак тӯли як ҳафта дар шаҳри Бӯстони вилояти Суғд баргузор шуд.
Дар ин бора ба Sputnik Тоҷикистон аз хадамоти матбуоти ҳукумати вилояти Суғд хабар дода, афзуданд, ки дар ин дидор ҷонибҳо барои муайяннамоии 17, 98 км хати сарҳад ба мувофиқа расидаанд.
"Ҷаласаи гурӯҳҳои корӣ давоми рӯзҳои 1 – 8 ноябри соли ҷорӣ дар меҳмонхонаи ба номи “Абуқодир Ҷабборзода”- и шаҳри Бӯстон сурат гирифт”- гуфт манбаъ.
Тибқи иттилоъи ин ниҳод дар мулоқоти навбатӣ ба ҳисоби масъулони дахлдор ҳамчунин намояндагони Кумитаи заминсозии Тоҷикистон ва Қирғизистон иштирок доштанд.
Манобеъ аз ҷараёни баргузории кори гурӯҳҳои байниҳукуматии Тоҷикистону Қирғизистон тафсилоти бештар ироа накарданд, вале изҳор намуданд, ки мулоқот дар фазои дӯстӣ сурат гирифтааст.
Тоҷикистону Қирғизистон беш аз 970 километр марзи муштарак доранд ва то ҳанӯз чандсад километри он таъйин ва аломатгузорӣ нашудааст.
Гурӯҳҳои кории байниҳукуматӣ талош доранд, марзи боқимондаро бо дарназардошти ҳифзи манофеи дуҷониба таъйин ва аломатгузорӣ кунанд. Мулоқоти ҷонибҳо бо навбат дар қаламрави тарафайн баргузор мегарданд.