ДУШАНБЕ, 31 окт — Sputnik. Нархи сӯзишворӣ ва доруворӣ бояд назорат шавад.
Дар ин бора муовини раиси Вилояти Мухтори Кӯҳистони Бадахшон Анвар Иматшозода зимни як ҷаласа изҳор дошт.
Дар баррасии масъалаи нархи доруву сӯзишворӣ раҳбарони идораҳои тандурустӣ ва хадамоти зиддиинҳисорӣ, намояндагони дорухонаҳо ва ширкатҳои таъминкунандаи бензину газ низ ширкат доштанд.
Дар ин ҷаласа муовини раиси ВМКБ аз гаронии нархи доруву маводи сӯхт изҳори нигаронӣ карда, таъкид кард, ки рӯзҳои охир ба минтақа бензини пастсифат ворид мешавад.
Ёдовар мешавем, ки қаблан дар нуқтаҳои фурӯши сӯзишвории ҷумҳурӣ болоравии нархи гази моеъ сабт шуда буд.
Бино ба таҳлилҳои Хадамоти зиддиинҳисории Тоҷикистон, нархи чаканаи фурӯши бензин дар нуқтаҳои фурӯши сӯзишвории кишвар шурӯъ аз нимаи дуюми моҳи июли соли равон рӯ ба афзоиш овардаст.
Ба иттилои ин ниҳод гаронӣ дар кишварҳои содиркунанда низ ба назар мерасад.
Коршиносони соҳа ин динамикаро аз як сӯ ба болоравии қимати нафт дар бозори ҷаҳонӣ ва аз сӯи дигар тағйири механизми демпинг марбут медонанд.
Масалан, Русия, ки таъминкунандаи аслии маҳсулоти нафтии бозори дохилии Тоҷикистон ба ҳисоб меравад, барои ҷуброни зиёни ширкатҳои нафтӣ ва танзими нархҳои нафтии онҳо механизми дамперро (пардохти махсуси давлатӣ, ки боиси афзоиши талаботи дохилӣ) ба кор андохтааст.
Илова бар ин, Қазоқистон ба далели зиёновар будани истеҳсолот тавлид ва коркарди гази моеъро коҳиш додааст.
Ширкатҳое, ки ба ин навъи сӯзишворӣ тахассус доранд, маҳсулоти худро бо зиён фурӯхтаанд.
Ба ин далел, вазорати энержии Қазоқистон тасмим гирифт, ки дар тӯли 3 сол ба тадриҷ нархи гази моеъро боло барад ва ҳамчунин содироти ин маводи сӯхтро маҳдуд кунад.