ДУШАНБЕ, 16 окт – Sputnik. Сардори Кумитаи давлатии амнияти миллии Тоҷикистон Саймуъмин Ятимов ва сардори Кумитаи давлатии амнияти миллии Қирғизистон Қамчибек Тошиев дар бораи марз мулоқот анҷом доданд.
Cардори Хадамоти матбуоти раиси вилояти Суғд, Музаффар Юнусов дар бораи ҷузъиёти ин мулоқот ба хабарнигори Sputnik Тоҷикистон иттилоъ дод.
Бино ба иттилоъи манбаъ, мулоқоти ҷонибҳо имрӯз дар шаҳри Бӯстони вилояти Суғд доир гардид.
“Дар мулоқот ба ҳисоби сардорони кумитаҳои амнияти миллӣ инчунин раисони вилоятҳои Суғду Ботканд ва мақомоти интизомӣ аз ҳарду ҷониб иштирок карданд” – гуфт, сардори Хадамоти матбуот.
Юнусов зикр кард, ки зимни мулоқот сарони ҳайатҳо аз рафти иҷрои созишномаҳои ҷонибҳо оид ба тавсифи хати лоиҳавии сарҳади давлатии Тоҷикистону Қирғизистон дар қитъаҳои боқимонда изҳори қаноатмандӣ намуданд.
Ба гурӯҳҳои кории топографӣ ва гурӯҳҳои корӣ оид ба масъалаҳои ҳуқуқии ҳайатҳои Ҳукумати Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистону Қирғизистон ҷиҳати пурзӯр намудани кор ва ҳалли тамоми масъалаҳои мавҷудаи сарҳадӣ супоришҳои мушаххас дода шуд.
Сарони ҳайатҳо аз аҳамияти имзои Протоколи No44 аз 2 октябри соли 2023 – ро дар иҷрои тамоми корҳо ва суръат бахшидан ба раванди делимитатсияи сарҳади давлатии Тоҷикистону Қирғизистон муҳим шуморида изҳор намуданд, ки омодаанд нуктаҳои онро қатъиян ба амал бароранд.