ДУШАНБЕ, 26 сен — Sputnik. Бонки миллии Тоҷикистон ба ташкилоти молиявӣ, ки бо номи ҷадид дар ҷумҳурӣ ба фаъолият оғоз мекунад, иҷозат додаст.
Ба иттилои дафтари матбуоти Бонки миллӣ, ҷамъияти саҳомии пӯшидаи "Халиқ Бонк Тоҷикистон" ба ҷамъияти саҳомии пӯшидаи "Актив Бонк" табдили ном кардаст.
Манбаъ афзуд, БМТ ба "Актив Бонк" барои анҷом додани амалиёти бонкӣ бо пули миллӣ ва асъори хориҷӣ тавассути азнавбарасмиятдарорӣ иҷозатнома дода шуд.
Департаменти назорати бонкӣ ва идораи низоми пардохт уҳдадор гардиданд, ки дар Феҳристи ташкилотҳои қарзӣ сабти дахлдор ворид намоянд.
"Халиқ Бонк Тоҷикистон", ки қаблан марбути Бонки мардумии амонатгузории Қазоқистон буд ва баъдан хабар дода шуд, ки 100%-и саҳмияҳои онро Бонки байналмилалии Тоҷикистон харидорӣ кард.
Бонки байналмилалии Тоҷикистон яке аз бонкҳои муваффақи кишвар буда, дорои филиалҳо ва марказҳои хизматрасонии бонкии зиёд буда, ба шахсони воқеӣ ва ҳуқуқӣ хизматрасониҳои муосири бонкиро пешкаш менамояд.