ДУШАНБЕ, 23 сен — Sputnik. Эмомалӣ Раҳмон, раисҷумҳури Тоҷикистон ба ҳамтои итолёии худ, Серчо Маттарелла барқияи тасаллӣ ирсол кард.
Дар ин бора дафтари матбуоти роҳбари давлат хабар дода, таъкид намуд, ки номаи ҳамдардии роҳбари давлат бинобар даргузашти собиқ кишвардор, Ҷорҷо Наполитано фиристода шуд.
"Хабари даргузашти собиқ президенти Ҷумҳурии Италия Ҷорҷо Наполитано боиси андуҳи мо гардид", - омадааст дар номаи ҳамдардии Эмомалӣ Раҳмон.
Дар идомаи нома, роҳбари давлат зикр намудааст, ки ҷаноби Наполитано бо фаъолияти сиёсии доманадори худ ҳамчун шахсияти боризи давлатӣ дар ҷомеаи Италия ва берун аз он шинохти умум пайдо намуда, соҳиби обрӯву эътибори шоиста гардида буд.
"Тоҷикистон нақши марҳумро дар таҳкиму тавсеа ва рушди равобити неку ҳамкории судманди Тоҷикистон ва Италия қадрдонӣ менамояд ва ба шахсияти ӯ эҳтиром мегузорад", - зикр шудааст дар идомаи нома.
Президенти Тоҷикистон аз ҳамтои итолёии худ хост, таъзияву таслияти самимии ӯро ба ҳамаи пайвандону наздикони Наполитано ва мардуми дӯсти Италия бирасонад.
Президенти собиқи Италия ва сенатори якумрӣ Ҷорҷио Наполитано рӯзи ҷумъа дар синни 99-солагӣ дар Рум даргузашт.
Ӯ аз моҳи майи соли 2006 то январи соли 2015 раҳбарии давлати Итолиёро бар ӯҳда дошт ва аввалин раиси ҷумҳури ин кишвар дар таърих шуд, ки барои давраи дуввум дубора интихоб шуд.