ДУШАНБЕ, 9 сен – Sputnik. Ахиран раиси вилояти Хатлон Давлаталӣ Саид дар дидор бо роҳбари намояндагии Бонки аврупоии таҷдид ва рушд дар Тоҷикистон ҷаноби Холгер Вифел масъалаҳои тавсеаи ҳамкории ҳукумати Хатлон ва намояндагии БАТР мавриди муҳокима қарор дода шуд.
Раиси вилояти Хатлон дар ин мулоқот изҳори итминон намуд, ки раванди маблағгузории лоиҳаҳо дар соҳаҳои афзалиятноки вилоят минбаъд низ босамар идома хоҳад ёфт.
Дар рафти мулоқот саҳми бонк дар таҳкими бахши молиявӣ, рушди бахши хусусӣ, ташкили инфрасохтори зарурӣ дар сатҳи маҳал, соҳаҳои нақлиёт, энергетика, обёрӣ, обтаъминкунии аҳолӣ ва баланд бардоштани сатҳи хизматрасониҳо дар вилояти Хатлон таъкид гардид.
Давлаталӣ Саид баланд бардоштани фаъолнокии иқтисодӣ, ташкили ҷойҳои нави корӣ барои аҳолии қобили меҳнат, инкишофи бозори молиявӣ ва дастгирии соҳибкории истеҳсолӣ, алалхусус дар самти коркарди ниҳоии маҳсулоти кишоварзӣ ва дигар ашёи хоми маҳаллиро аз самтҳои дигари ҳамкорӣ арзёбӣ намуд.
Дар ҳамин ҳол ба иттилои манбаъ, дар ҷараёни вохӯрӣ роҳбари намояндагии БАТР дар Тоҷикистон қайд кард, ки намояндагии бонк ба тақвияти ҳамкориҳо дар самти дастгирии бахши хусусӣ ва соҳибкорон, машваратҳои касбӣ, татбиқи лоиҳаҳо дар самти технологияҳои рақамӣ, маблағгузории иқтисодиёти сабз, обтаъминкунӣ алоқаманд мебошад.
“Тавре ки иттилоъ дорем, дар Тоҷикистон Маркази зеҳни сунъӣ ва иқтисоди рақамӣ таъсис дода шудааст, ки ин аввалин чунин марказ дар Осиёи Марказӣ мебошад. Мо аз ин талоши ҷониби Тоҷикистон барои рушди зеҳни сунъӣ ва рақамикунонии иқтисод ҷонибдорӣ мекунем”, - афзуд Холгер Вифел.