ДУШАНБЕ, 8 сен — Sputnik. Футболбозони тими миллии Тоҷикистон бо ҳисоби 2:0 бар тими Сингапур пирӯз шуданд.
Ба иттилои Федератсияи футболи Тоҷикистон, бозии дӯстона дар варзишгоҳи "Бишан"-и Сингапур баргузор гардид.
Манбаъ афзуд, ки дар даври аввали бозӣ аллакай дар дақиқаи 6-ум Муҳаммадҷон Раҳимов голро вориди дастаи мизбон карду тими Тоҷикистонро таҳти роҳбарии Петр Сегрт ба пеш баровард.
Голи дуюми дастаи Тоҷикистон Ваҳдат Ҳанонов аллакай баъди анҷоми даври асосии бозӣ дар дақиқаҳои иловагии замнамудаи довар вориди дарвозаи Сингапур намуд.
Маврид ба зикр аст, ки мутахассиси хорватӣ Петр Сегрт, сармураббии тими Тоҷикистон барои бозӣ бо тими Сингапур 19 бозигарро даъват карда буд.
Аз ҷумла ситоди мураббиён 2 дарвозабон, 6 ҳимоятгар, 7 нимҳимоятгар ва 4 ҳамлагарро барои рақобат бо Сингапур ҷалб сохт.
Дар робита ба ширкати мунтахаби олимпии Тоҷикистон (U-23) дар мусобиқаи интихобии Ҷоми Осиё-2024, ки то 12-уми сентябр дар шаҳри Душанбе ҷараён дорад, бархе аз бозигарони тими миллӣ ба бозӣ бо Сингапур даъват нагардида буданд.