ДУШАНБЕ, 7 сен — Sputnik. Мунтахаби футзали Тоҷикистон таҳти роҳбарии Пайрав Воҳидов барои ширкат дар мусобиқаи байналмилалӣ бахшида ба 956-умин солгарди шаҳри Минск озими Беларус гардид.
Дар ин бора Федератсияи футболи Тоҷикистон иттилоъ дода, афзуд, ки дар мусобиқаи Минск се даста ширкат мекунанд.
Дар феҳрасти иштирокдорон мунтахабҳои Беларус, Тоҷикистон ва инчунин бошгоҳи футзали КПРФ-и Русия ном бурда шуданд.
Дар баробари ин футзалбозони тоҷик бо чемпионҳои Беларус дастаи "Сталитса" бозии дӯстона мегузаронанд.
Дар доираи мусобиқа бозии мунтахаби Тоҷикистон бо тими КПРФ-и Русия 9 сентябр соати 18:00 бо вақти Душанбе ва бо мунтахаби Белорус 10 сентябр соати 10:00 дар назар мебошад.
Сармураббӣ ба ҳайати мунтахаби футзали Тоҷикистон 15 бозигар – 3 дарвозабон ва 12 бозигарро ворид намудаст.
Ин бозӣ марҳилаи хуби омодагӣ барои мусобиқаи интихобии Ҷоми Осиё-2024 оид ба футзал арзёбӣ мешавад.
Дар ин мусобиқа мунтахаби Тоҷикистон дар гурӯҳи "Е" бо Ҳиндустон (7 октябр), Фаластин (9 октябр) ва Мянмар (11 октябр) дар шаҳри Душанбе рақобат мекунад.