ДУШАНБЕ, 6 сен — Sputnik. Вазъ дар бахши шарқии ҷабҳа душвор буда, нерӯҳои ҷониби Русия талоши пешравӣ ва озод кардани тамоми қаламрави Донбассро доранд.
Ин нуктаро фармондеҳи нерӯҳои заминии Қувваҳои мусаллаҳи Украина генерал-полковник Александр Сирский баён доштаст.
"Вазъияти амалиётӣ дар самтҳои шарқӣ мушкил боқӣ мемонад. Душман аз нақшаи расидан ба марзҳои вилоятҳои Донетск ва Луганск даст намекашад", - гуфтаст Сирский.
Таъкиди генерали баландпояи украинӣ ба вазъияти душвор дар ҳолест, ки Украина чанд моҳ боз талош дорад, ҳамлаи ҷавобиро роҳандозӣ кунад.
Вазири дифои Русия Сергей Шойгу ахиран гуфт, аз оғози амалиёти ба истилоҳ ҷавобӣ, артиши Украина беш аз 66 ҳазор нафар ва 7600 техникаро аз даст додааст.
"Бо вуҷуди талафоти азим, режими Киев моҳи сеюм аст, ки талош дорад амалиёти ба истилоҳ зиддиҳамларо анҷом диҳад. Нерӯҳои мусаллаҳи Украина дар ҳеҷ як самт ба ҳадафҳои худ нарасидаанд", - гуфт мавсуф.
Ӯ қайд кард, ки дар самти Запороже вазъияти тезу тундтарин ба амал омад, ки дар он ҷо душман захираи стратегӣ гуруҳҳоро ба ҷанг овард.
Қӯшунҳои Русия дар самтҳои Купянск ва Кременск қатъиян амал карда, шаҳраки Новоселовскоеро озод карданд ва мавқеъи худро дар хати ҷабҳа ба таври қобили мулоҳиза беҳтар намуданд, таъкид кард Шойгу.