ДУШАНБЕ, 2 сен – Sputnik. Қитъаи роҳи аз самти Дарвозаи ҷанубӣ то Сирки давлатӣ дар шаҳри Душанбе барои сохтмони метрои сабуку босуръати рӯизаминӣ мувофиқ арзёбӣ шудааст.
Ба иттилои Вазорати нақлиёти Тоҷикистон дарозии ин масир беш аз 10 км-ро ташкил дода, аз нигоҳи релефу дигар омилҳо барои бунёди метро мувофиқ мебошад.
Таъкид шуд, ки ахиран барои маблағгузории корҳои омӯзишии пешакӣ ва Асосноккунии техникиву иқтисодии сохтмони метро дар Душанбе бо Бонки содиротиву воридотии Кореяи Ҷанубӣ мувофиқа шудааст.
Масъулини нақлиёти Тоҷикистон мегӯянд, ҳамчунин Бонки содиротиву воридотӣ ваъда доданд, ки дар баробари корҳои омӯзишии пешакӣ, таҳияи муфассали тарҳи метроро низ маблағгузорӣ мекунанд.
Тавзеҳ дода шуд, ки ин танҳо марҳилаи омодагӣ буда, бунёди метро марҳилаҳои зиёдро аз тарҳу сохтмон то нигоҳдорию танзимро дар бар мегирад.
Маврид ба зикр аст, ки ахиран Вазорати нақлиёт ва Ширкати миллии роҳи оҳани Кореяи Ҷанубӣ ёддошти тафоҳум оид ба сохтмони метро дар шаҳри Душанберо ба имзо расонида буданд.
Нияти мақомоти Тоҷикистон барои бунёди метро дар ҳолест, ки бо мурури афзоиши аҳолӣ талабот ба нақлиёти ҷамъиятӣ низ афзоиш ёфтааст. Баъзан сокинону меҳмонони Душанбе аз камбуди нақлиёти ҷамъиятӣ дар роҳҳои пойтахт шикоят мекунанд.