Хабарнигори Sputnik Тоҷикистон дар ҷамъомади таълимии ин мактаб иштирок кард ва бо омӯзгорону толибилмон ва волидон дар бораи умеду орзӯҳояшон дар соли нави хониш пурсон шуд.
Аз суҳбат бо мусоҳибон маълум мешуд, ки ҳаркадоми онҳо соли нави хонишро бо рӯҳи тоза ва умедвориҳои зиёди илмомӯзӣ хуш истиқбол мекунанд.
Шоира Эшматова, муовини директор оид ба корҳои тарбиявӣ дар МТМУ ба номи А. П. Чехов дар Хуҷанд афзуд, ки баргузории озмун ва олимпиядаҳои соли гузашта ҳокӣ аз он, ки ҳамаи шогирдони ин мактаб рӯзи 1 - сентябрро бесаброна интизорӣ мекашиданд.
Бино ба гуфти ӯ, дар раванди таълим дар ин мактаб ҳар рӯз озмунҳои онлайнӣ баргузор карда мешаванд.
“Баргузории чунин шеваҳои муосири таълимӣ барои ҳар як толибилми мактаб писанд меуфтад. Имрӯз онҳо бо рӯҳияи тоза сари мизҳои мактабӣ омадаанд” – таъкид варзид, Эшматова
Бино ба иттилоъи манбаъ соли ҷорӣ 1080 толибилми синфҳои 1 – 9 аз шаҳру навоҳии Суғд имкони таҳсил дар мактаби муосири русӣ дар шаҳри Хуҷандро пайдо намуданд. Ин рақам дар муқоиса ба соли гузашта 120 нафар бештар гуфта мешавад. Дар мактаби мазкур беш аз 80 омӯзгор дарс мегуянд. Соли ҷорӣ як гурӯҳ омӯзгорон аз шаҳрҳои Федератсияи Русия барои дарс гуфтан ба ин мактаб омадаанд.
Нозанин Комилова, хонандаи синфи 9 дар МТМУ ба номи А. П. Чехов дар Хуҷанд имрӯз дар ҷамомади таълимӣ соҳиби диплом ва медал гардид. Ӯ, хушҳолияшро дар суҳбат ба Sputnik Тоҷикистон чунин баён намуд.
“Баъди чанд рӯзи дур аз мактабу ҳамсинфон буданд, инак соли нави таҳсил фаро расид ва ҷамъомади деринтизори таълимӣ ҳам баргузор гардид ва хеле шодам, ки ба ман диплом ва медал тақдим намуданд. Дар ин мактаб савод меомӯзанд ва ҳам дониши шуморо қадр мекунанд, раҳмат ба омӯзгорон, хеле хушнуд аз он ҳастам, ки дар ин мактаб таҳсил мекунам”.
Макотиби муосири русӣ дар Тоҷикистон як сол қабл рӯзи 1 сентябр аз ҷониби кишвардорони Тоҷикистону Русия, Эмомалӣ Раҳмон ва Владимр Путин дар фазои тантанавӣ расман мавриди баҳрабардорӣ қарор дода шуданд.
Чунин макотиб дар шаҳрҳои Душанбе, Хуҷанд, Бохтар, Кӯлоб ва Турсунзода бунёд шудааст.
Хабарнигори Sputnik Тоҷикистон, 1 сентябр ба мактаби муосири русӣ ба номи А. П. Чехов рафт ва ҷараёни баргузории Рӯзи донишро навор гирифт. Шумо барои дидани гузориши ҷолибу зебо ин нишонро клик кунед.