ДУШАНБЕ, 17 авг — Sputnik. Эмомалӣ Раҳмон, раисиҷумҳури Тоҷикистон, дар оғози рӯзи сеюми сафараш ба ВМКБ аз ҶДММ "Суман" боздид карда, бо ҷараёни кори он ошно шуд.
Дар ин бора аз дафтари матбуоти раисҷумҳури кишвар гузориш медиҳанд.
Гуфта мешавад, ки корхонаи мазкур бо истифода аз технологияҳои муосири саноатӣ ба истеҳсоли сангҳои бинокорӣ ва ороишӣ машғул аст.
"Дар ҳоле ки корҳои сохтмонӣ дар ҷумҳурӣ босуръат ҷараён доранд, талабот ба ин маҳсулот ҳам дар минтақа ва ҳам дар саросари ҷумҳурӣ зиёд аст", - таъкид намуд манбаъ.
Ҳамин тариқ, "Суман" 8 намуди санги “Гранит”, 2 намуди санги “Сланес”, 2 навъи “Офикалсит” ва 3 намуди санги “Мармар”-ро коркард мекунад.
Гуфта мешавад, ки бо мақсади рушди истеҳсолот ва таъсиси ҷойҳои нави корӣ бунёди 4 корхонаи дигар дар назар аст.
Илова бар ин, роҳбари кишвар корхонаи пойафзолбарории "Сандал"-ро боз кард, ки аз тарафи соҳибкори ҷавон Аъзамҷон Аҳруллоев сохта шуда, таҳти унвони “ЯК” маҳсулот истеҳсол мекунад.
Таъкид мешавад, ки барои истеҳсоли босифати пойафзоли “ЯК” ашёи хом аз Туркия ворид гардида, иқтидори истеҳсолии коргоҳ дар як сол аз 15 то 20 ҳазор ҷуфт пойафзолро ташкил медиҳад.
“Сандал” дар шаҳри Хоруғ ягона корхонаи истеҳсоли пойафзол мебошад, ки бо дизайну махсусиятҳои хоса ба фаъолият пардохтааст.
Эмомалӣ Раҳмон дар пайи боздидҳо ба масъулин дастур додааст, ки шумори корхонаҳои саноатиеро, ки ашёи хоми маҳаллиро пурра коркард ва маҳсулоти рақобатпазир истеҳсол мекунанд, зиёд кунанд.
Ёдовар мешавем, ки раисиҷумҳури Тоҷикистон Эмомалӣ Раҳмон бо як сафари корӣ дар Вилояти Мухтори Кӯҳистони Бадахшон қарор дорад.