ДУШАНБЕ, 6 авг — Sputnik. Корхонаҳои Тоҷикистон дар нимсолаи аввали соли равон 11 ҳазор тон равғани растанӣ истеҳсол кардаанд.
Дар ин бора Хадамоти зиддиинҳисории Тоҷикистон иттилоъ дода, афзуд, ки ин нисбат ба ҳамин давраи соли гузашта 489 тонна ё қариби 5% зиёд мебошад.
Қаблан раисҷумҳури Тоҷикистон, Эмомалӣ Раҳмон вазорату идораҳоро муваззаф кард, ки дар ҳамкорӣ бо соҳибкорону сармоягузорон дар соли 2023 корхонаҳои равғанбарории шаҳрҳои Душанбе, Бохтар ва Конибодомро фаъол созанд.
Вазири саноат ва технологияҳои нави Тоҷикистон, Шералӣ Кабир қаблан изҳор дошта буд, ки таъминоти бозор бо равғани худӣ ба мушкили аслӣ табдил ёфтааст.
Ӯ зикр намуд, ки дар айни ҳол иқтидорҳои тавлиди равған дар Тоҷикистон ҳамагӣ 20%-и талаботи бозорро таъмин мекунанд.
Вазир гуфт, барои ислоҳи вазъ дар Ӯзбекистон бо масъулини ширкати чиние мулоқот дошт, ки ба тавлиди таҷҳизот барои истеҳсоли равған машғуланду дар кишвари ҳамсоя чандин корхонаро фаъол кардааст.
Вай илова намуд, ки барои фаъолсозии иқтидорҳои нав дар Тоҷикистон, аз ҷумла корхонаҳои равғанбарории замони шӯравӣ дар Бохтар, Душанбе, Конибодом ва Хуҷанд мутахассисони ширкати чиниро даъват кардааст.
Шералӣ Кабир изҳори умед намуд, ки бо ҷалби ин ва дигар шарикон иқтидорҳои нави равғанбарорӣ дар Тоҷикистон фаъол хоҳанд шуд.