ДУШАНБЕ, 2 авг — Sputnik. Муовини раиси "Тоҷикстандарт" Давлатшоҳ Мирзоён зимни нишасти матбуотӣ гуфт, ки талош доранд маҳсулоти Тоҷикистон ба бозори “Ҳалол” роҳ ёбад.
Вай афзуд, ки ҳар кас дар бозори ҳалол ҷой гирифта наметавонад.
Оқои Мирзоён гуфт, дар ҳоли ҳозир зиёда аз 4,5 милрд аҳолии ҷаҳон то агар дар маҳсулот нишони “Ҳалол” набошад онро истеъмол намекунанд.
Мақомодори тоҷик мегӯяд, ки Тоҷикистон ҳоло аъзои Созмони ҳамкориҳои давлатҳои исломӣ дар бахши стандартизатсия ҳаст. Тоҷикистон аз моҳи январи соли 2023 узви ин созмон шудааст.
“Мо имконияти истифодаи стандарти “ҳалол”-е, ки дар давлатҳои исломӣ аз тарафи Туркия таҳия гаштааст ва истифода мешавад, дорем. Ҳамчунин мо имконияти бо воситаи стандарти “ҳалол” иҷозатнома додани коргоҳҳоро дорем”, - гуфт ӯ.
Вай афзуд, ки ин бисёр бозори калон аст ва Тоҷикистон аз ҳамин бозор канор буда наметавонем.
“Мо бояд дар ин бозор бошем. Ин иқтисодиёт аст. ин пешрафт аст”, - қайд кард муовири раиси “Тоҷикстандарт”.
Ҳамчунин ба гуфтаи мақомдори тоҷик стандарти “Ҳалол” рӯз то рӯз боло меравад ва талабот ба маҳсулоти зери тамғаи исломӣ зиёд шудааст.
“Талаботи стандарти “Ҳалол” бе ниҳоят вазнин аст. яъне дар як сех ё коргоҳе, ки маҳсулоти “ҳалол” мебарорад, иҷозат нест, ки дигар намуди маҳсулот тавлид карда шавад. Сар карда аз намаке, ки истифода мешавад, тамоми маводҳое, ки дар таркиби маҳсулот истифода мешавад, ҳар яке ӯ бояд тибқи стандарти “Ҳалол” сертификатсия карда шуда бошанд”, - гуфт Давлатшоҳ Мирзиён.
Мақомдор зикр кард, ки ин ҷо масъалаи ҳалолу ҳаром нест. инҷо гап сари маҳсулоти хатарноку бе хатар меравад.
Вай илова кард, ки стандарти “Ҳалол” дар тамоми намуди маҳсулот истифода мешавад. Ҳатто дар атриёт.