ДУШАНБЕ, 1 авг — Sputnik. Мақомоти вилояти Суғд аз сохтмони чандин иншооти нав дар ҳудуди фурудгоҳи байналмилалии Хуҷанд хабар доданд.
Ба иттилои дафтари матбуоти раиси вилояти Суғд ахиран Раҷаббой Аҳмадзода бо ҷараёни корҳои ободониву созандагӣ дар Фурудгоҳи байналмилалии Хуҷанд шинос шуд.
Ба иттилои манбаъ, дар Фурудгоҳи байналмилалии Хуҷанд ба хотири боз ҳам баланд бардоштани сатҳу сифати хизматрасонӣ ба мусофирон, ҳамзамон саҳм гузоштан дар рушди соҳаи сайёҳӣ ва бо ин васила ҷалби бештари сайёҳони дохилу хориҷ корҳои созандагиву ободонӣ бомаром идома дорад.
Манбаъ хабар додааст, ки дар фурудгоҳ барои нигаҳдории мошинҳо дар минтақаи истгоҳи мошинҳои махсус боксҳо бо ғунҷоиши 20 нақлиёт бунёд гардида, дар ошёнаи дуюми бинои мазкур утоқҳои корӣ барои кормандон сохта мешаванд.
Ҳамзамон корҳои пардозгарӣ дар дохили биноҳо меҳмонхона ва ошхонаву тарабхонаи нав идома дорад.
Бинои меҳмонхона аз 5 ошёна ва 90 ҳуҷра иборат буда, дорои 188 кат мебошад.
Бинои ошхона ва тарабхона бо ҷойи нишаст барои то 300 нафар сохта шуда, дар оянда шабонарӯзӣ фаъолият хоҳад кард.
Ҳамчунин ба иттилои манбаъ дар ҳудуди фурудгоҳ коргоҳи дӯзандагӣ ташкил шуда, либосҳои махсуси корӣ барои кормандони шуъбаву хадамоти фурудгоҳ омода карда мешавад.
Роҳбари вилояти Суғ Раҷаббой Аҳмадзода зимни боздид аз ин иншоотҳо бо собиқадорон, кормандони фурудгоҳ, ки солҳои зиёд дар он фаъолият намуда истодаанд, суҳбат кард.
Вай дар ин дидор ба чор нафар кормандони фурудгоҳ туҳфаҳои моливу пулӣ аз номи раҳбари кишвар тақдим кард.