ДУШАНБЕ, 30 июл – Sputnik. Шумори қурбониёни таркиш дар анҷумани Ҳизби ҷамъияти уламои исломӣ дар вилояти Хайбар-Пахтунхваи Покистон ба 35 нафар расид.
Дар ин бора хабаргузории Dawn бо такя ба хадамоти изтирории Покистон иттилоъ дода, афзудааст, ки ҳамчунин беш аз 80 нафар маҷрӯҳ шуданд.
Гуфта мешавад, ки таркиш тақрибан соати 16:00 ба вақти маҳаллӣ (14:00 ба вақти Маскав) дар дохили бино дар ҷараёни анҷуман рух додааст. Пулис то ҳол нагуфтааст, ки сабаби таркиш чист.
Раҳбари ҳизб, Ҳофиз Ҳамдулло гуфтааст, ки ӯ низ мебоист дар анҷуман ширкат мекард, аммо бо сабабҳои шахсӣ ширкат карда натавонист.
Ӯ таркишро маҳкум карда, ҳодисаро "терроризм" номид ва аз раҳбарияти кишвар ва вилоят даъват кард, ки дар робита ба ин ҳодиса тафтишот оғоз кунанд.
Ҳофиз Ҳамдулло ҳамчунин аз ҷонибдорони ҳизб даъват кард, ки барои кумак ба осебдидагони таркиш хун супоранд.
Раиси Ҳизби мардумии Покистон, Билавал Бҳутто Зардорӣ, ки ҳамзамон вазири умури хориҷаи ин кишвар низ мебошад, изҳор дошт, ки ҳукуматҳои федеролӣ ва музофотӣ бояд шарикони террористро ба ҷавобгарӣ кашанд.
Зардорӣ бо изҳори ҳамдардӣ ва тасаллият ба наздикони қурбониён таъкид кард, ки созмондиҳандагони терроризм бояд муҷозот гарданд.