ДУШАНБЕ, 29 июл — Sputnik. Боришоти шадиди борон боиси омадани сел дар вилояти Суғд гардид, хабар медиҳад дафтари матбуоти Кумитаи ҳлатҳои фавқулода.
Бар хабари манбаъ, сел дар ҳудуди ҷамоати деҳоти Урметани ноҳияи Айнӣ омад, ки дар натиҷа роҳҳои маҳаллӣ иншооти ёрирасон ва биноҳои истиқоматӣ хароб гардиданд.
"Тибқи маълумоти пешакӣ, сел ба 63 хоҷагӣ, аз ҷумла 7 бинои истиқоматӣ, 56 иншооти ёрирасон ва қитъаҳои замини наздиҳавлигӣ қисман зарар расонд", - омадааст дар хабари КҲФ.
Манбаъ афзуд, ки офати табиӣ дар пай талафоти ҷонӣ надошт.
Феълан, барои муайян кардани хисорот ва расондани кумак комиссияҳои вилоятӣ ва ноҳиявӣ оид ба вазъияти фавқулода дар ҷойи ҳодиса фаъолият доранд.
КҲФ ҳамчунин аз омадани сел дар деҳоти Ёрӣ, Лоиқ Шералӣ ва ҷамоати деҳоти Амондараи шаҳри Панҷакент хабар дод. Дар натиҷаи омадани сел роҳҳои деҳот ва заминҳои кишоварзӣ зарар диданд. Феълан маълумот дар бораи хисороти расида маълум нест.
Илова бар ин, сел дар ҳудуди ҷамоати деҳоти Ворухи шаҳри Исфара, минтақаҳои Истаравшан ва Деваштич низ омадааст, вале ба хонаҳои аҳолии маҳаллӣ осеб нарасонд.
Қаблан КҲФ аз боришоти шадиди борон ва омдани селу ярч дар минтақаҳои гуногун хабар дода буд.