ДУШАНБЕ, 29 июл — Sputnik. Миёни ширкатҳои хориҷие, ки дар бозори мусофирбарии байналмилалии ҳавоии Тоҷикистон фаъолият доранд, 5 ададаш ширкатҳои русиягӣ мебошанд.
Дар ин бора Агентии ҳавонавардии шаҳрвандии Тоҷикистон иттилоъ дода, афзуд, ки дар нимсолаи якуми соли 2023 аз фурудгоҳҳои байналмилалии ҷумҳурӣ хориҷи дуру наздик 1 ширкати ватанӣ ва 11 хориҷӣ мусофирбарӣ кардаанд.
Дар феҳрасти ширкатҳои русиягии фаъол дар Тоҷикистон, аз ҷумла "Utair", "Уралские авиалинии", "Северний ветер", "Сибир-S7" ва "Ямал" номбар карда шудаанд.
Агентӣ таъкид кард, ки масирҳои Тоҷикистон - Русия аз ҷумлаи серталабтарин миёни мусофирон дар ҷумҳурӣ мебошанд.
Дар баробари ширкатҳои русӣ инчунин "Эйр Астана"-и Қазоқистон, “Ӯзбек Ҳаво Юллари”-и Ӯзбекистон, "Флай Дубай"-и Аморати Муттаҳидаи Араб, "Туркиш Айрлайнс"-и Туркия, "Вариш Айрлайнс"-и Эрон, "Ҷазира Эйрвейз"-и Кувайт ва “AZAL”-и Озарбойҷон парвозҳо анҷом медиҳанд.
Дар нимсолаи якуми соли 2023 фурудгоҳҳои байналмилалии кишвар ҳамагӣ ба қариб 1,7 млн мусофир хизмат расондаанд, ки аз ин қариб 1 млн нафараш ба фурудгоҳи байналмилалии Душанбе рост меояд.
Мусофирбарӣ аз тариқи фурудгоҳи байналмилалӣ дар шашмоҳаи соли равон нисбат ба ҳамин давраи соли гузашта қариби 400 ҳазор нафар ё 30% афзоиш ёфтаанд.