Коҳиши содиршавии ҷиноят дар вилояти Хатлон

Прокурори вилояти Хатлон ахиран ба рӯзноманигорон гуфт, ки содиршавии ҷиноят дар қаламрави вилоят нисбат ба ҳамин давраи соли гузашта 10% кам шудааст
Sputnik
ДУШАНБЕ, 27 июл — Sputnik. Дар вилояти Хатлон сатҳи ҷинояткорӣ дар 6 моҳи соли равон тамоюли пастравӣ доштааст, иттилоъ дод прокурори вилоят Абдураҳим Раҳимзода зимни нишасти матбуотиаш ба хабарнигорон.
Ба гуфтаи вай, ҷинояткорӣ нисбат ба шаш моҳи соли гузашта 342 ҷиноят ё 9,6% кам содир шудааст.
Оқои Раҳимзода зимни нишасти матбуотиаш қайд кард, ки дар 6 моҳи соли равон 3221 ҷиноят ба қайд гирифта шудааст ва 38%-и ин ҷиноятҳоро кормандони мақомоти прокуратураи вилояти Хатлон ошкор намудаанд.
Қайд гардид, ки дар ин давра ба прокуратураи вилоят 3643 муроҷиат ворид гардидааст, ки бештари муроҷиатҳо ба замин ва қонунвайронкунӣ дар ин самт марбут мебошад.
“Дар самти назорати иҷрои қонунгузории замин 97 санҷиш гузаронида, 3794 қонунвайронкунӣ ошкор гардид”, - гуфт ӯ.
Оқои Раҳимзода илова кард, ки барои бартарафсозии онҳо 1973 нафар роҳбарони мақомотҳои дахлдор ва ташкилоту муассисаҳо ба ҷавобгариҳои моддӣ, интизомӣ ва маъмурӣ кашида шуда, барои ғайриқонунӣ додани замин, худсарона ишғол намудани қитъаи замин ва дигар ҷиноятҳои ба замин алоқаманд 300 парвандаи ҷиноятӣ оғоз карда шудааст.
Дар Хатлон то ҳол 15 бунгоҳи таббӣ дар хонаи шахсӣ асту якеш дар вагон
Ҳамзамон, иттилоъ дода шуд, ки кормандони мақомоти прокуратураи вилоят бо дарназардошти афзоиши башиддати садамаҳои воситаҳои нақлиёт 1717 қонунвайронкуниро ошкор ва ҷиҳати рафъи қонунвайронкуниҳо 689 санади прокурорӣ тартиб доданд.
“Бо баррасии онҳо 969 нафар ба ҷавобгарии интизомӣ, моддӣ ва маъмурӣ кашида, 37 парвандаи ҷиноятӣ оғоз карда шудааст”, - афзуд додситони Хатлон.