ДУШАНБЕ, 26 июл — Sputnik. Дар вилояти Хатлон қариб 14 ҳазор зан дар вазифаҳои роҳбарикунанда фаъолият мекунанд.
Дар ин бора нашрияи расмии вилоят - "Хатлон" иттилоъ дода, афзуд, ки аз шумораи умумии қариб 3 ҳазор воҳиди хизматчиёни давлатӣ дар 540 воҳиди корӣ занон машғули коранд.
Таъкид шудааст, ки аз ин шумора 209 нафар, ки муодили қариб 39% аст, дар вазифаҳои роҳбарикунандаи хизмати давлатӣ фаъолият доранд, омадааст дар иттилоия.
Манбаъ афзудаст, ки дар сохторҳои мақомоти иҷроияи ҳокимияти давлатии вилоят, шаҳру ноҳияҳо, ташкилоту муассисаҳо шумораи бонувон афзун гардида истодааст.
Зикр гардидаст, ки бо мақсади бештар шудани теъдоди занони роҳбар дар ҷануби кишвар, дар шаҳри Бохтар курси омӯзишии "Мактаби сарварӣ" барои бонувон оғоз гардид.
Муовини раиси вилояти Хатлон Фирӯза Шарифӣ, дар оғози даври омӯзишӣ таъкид кардааст, ки занон дар маркази диққати роҳбарияти олии мамлакат буда, баҳри фаъолияти босамари онҳо кулли имкониятҳо фароҳам шудаанд.
Вай, аз ҷумла, таҳия ва қабул гардидани як қатор барномаву стратегияҳо ва санадҳои меъёриву ҳуқуқӣ дар самти беҳдошти вазъи занон барои беҳтар намудани сатҳи иҷтимоию иқтисодӣ, фарҳангию маърифатии оилаҳо, пешгирии зӯроварӣ нисбати занон таҳия шудаанд.
Ба гуфтаи Шарифӣ, ин чорабиниҳо барои баланд бардоштани мақоми зан дар ҷомеа, иштироки фаъолонаи онҳо дар идори давлат ва омода намудани кадрҳои болаёқату донишманд аз ҳисоби занону духтарон мусоидат менамоянд.