ДУШАНБЕ, 23 июл — Sputnik. Зиёда аз 30 нафар дар Афғонистон бар асари обхезӣ ба ҳалокат расида, даҳҳо нафари дигар бедарак шудаанд.
Дар ин бора хабаргузории Tolo News бо истинод ба сухангӯи Вазорати имдод ва бартарафсозии офатҳои табиии Афғонистон, Шафиуллоҳ Раҳимӣ гузориш дод.
Ба иттилои манбаъ, садҳо хона пурра ё қисман хароб шуда, ба заминҳои кишоварзӣ зарар расонида шуд. Таъкид шудааст, ки обхезӣ дар Афғонистон дар чанд рӯзи охир давом дорад.
"Дар 72 соати ахир бар асари обхезиҳо дастикам 31 нафар кушта, 74 нафар захмӣ ва 41 нафари дигар бедарак шудаанд", - изҳор доштаст Раҳимӣ.
Сухангӯи Вазорати имдоду бартарафсозии офатҳои табиӣ афзуд, ки 250 сар чорво талаф ёфтааст.
Баъзе роҳҳо, аз ҷумла шоҳроҳе, ки шаҳри Бомиёнро бо Кобул мепайвандад, баста шудааст.
Қаблан хабар дода шуда буд, ки борон боиси обхезии манотиқи шаҳрӣ ва хисороти зербиноӣ дар бахшҳое аз Лоҳури Покистон шудааст.
Аз ҷумла гузориш дода шуда буд, ки дар Лоҳур 291 мм боришот ба қайд гирифта шудааст. Ин баландтарин нишондод дар шаҳр дар 30 соли охир буд.
Дар натиҷаи фурӯ рехтани боми хона як оилаи иборат аз 4 нафар, аз ҷумла як кӯдаки 11-сола дар оби борон ғарқ шуда, 4 нафари дигар бар асари зарбаи барқ ба ҳалокат расидаанд, иттилоъ доданд мақомоти Покистон.