ДУШАНБЕ, 17 июл — Sputnik. Раҳбарони кишварҳои узви БРИКС меъёрҳои қабули аъзои навро ба созмон баррасӣ хоҳанд кард.
Ин нуктаро вазири умури хориҷии Бразилия, Мауро Виейра дар сӯҳбат бо РИА "Новости" иттилоъ дода, афзуд, ки баррасии ин масъала дар ҷараёни нишаст дар Йоҳанесбурги Африқои Ҷанубӣ дар назар аст.
"Теъдоди кишварҳои манфиатдор барои пайвастан ба БРИКС аз аҳамияти он дар арсаи ҷаҳонӣ гувоҳӣ медиҳад. Ҳоло мо бояд меъёрҳои арзёбии ин дархостҳоро баррасӣ ва мувофиқа кунем, ки дар ин ҳамоиш анҷом мешавад", - гуфт Виейра.
Вай таъкид намуд, ки Бразилия ният дорад, ки дархости шарики стратегии худ - Аргентинаро барои узвият дар БРИКС дастгирӣ кунад.
"Аммо аввал, тавре ки гуфтам, мо бояд харитаи роҳро барои ояндаи гурӯҳ таҳия кунем ва бо назардошти дархостҳои зиёде, ки ба мо расидаанд, дар мавриди меъёрҳо ба тавофуқ бирасем", - афзуд вазир.
Қаблан вазири умури хориҷии Русия, Сергей Лавров, гуфта буд, ки Ғарб мехоҳад аз таҳкими сафи ҳамфикрҳои Русияву Чин ҷилавгирӣ кунад ва ҳадафаш ҷилавгирӣ аз густариши БРИКС аст.
Вай таъкид кард, ки аксарияти ҷаҳон "бо қоидаҳои ғарбӣ" зиндагӣ кардан намехоҳад ва меъёрҳои универсалии ҳуқуқи байналмилалиро, ки пеш аз ҳама дар Оинномаи СММ таҷассум ёфтаанд, ҳимоят мекунанд".
БРИКС ё худ BRICS баргирифтаи ҳарфҳои аввали номи 5 узви ин созмон бо забони англисӣ мебошад, ки айни ҳол ба яке аз созмонҳои бонуфузи ҷаҳонӣ табдил ёфта истодааст.
Созмони мазкур аз 5 давлат - Бразилия, Русия, Ҳиндустон, Чин, Африқои Ҷанубӣ иборат мебошад.