ДУШАНБЕ, 15 июл — Sputnik. Кремл бо ин фикр розист, ки ИМА метавонанд ба низоъ дар Украина хотима бахшад, чун маҳз онҳо таъмингари силоҳ ҳастанд, изҳор дошт сухангӯи раисҷумҳури Русия Дмитрий Песков.
"Маҳз ИМА Украинаро бо силоҳ таъмин мекунаду водор месозад, ки то охирин украинӣ биҷангад", - гуфт Песков.
Ахиран сарвазири Маҷористон Виктор Орбан зимни суҳбат дар радиои "Kossuth" изҳор дошт, ки муноқиша дар Украина ҳамин ки Иёлоти Муттаҳида бихоҳад, хотима меёбаду худи фардо сулҳ барқарор мешавад.
Ӯ гуфт, чаро ИМА сулҳ намехоҳад, тамоми ҷаҳон сари ин масъала фикр дорад, чун Украина аллакай соҳибихтиёрии худро аз даст дода ва вазъ дар кишварро Ғарб, пеш аз ҳама ИМА муайян мекунанд.
"Агар ИМА мегуфт, ки онҳо сулҳ мехоҳанд, биёед оташбас кунем ва гуфтушунидро оғоз кунем, ин субҳи дигар ба вуқӯъ меомад. Чаро амрикоиҳо инро намехоҳанд, мо дар нишасти НАТО посух нагирифтем”, - гуфт сиёсатмадор.
Ба андешаи ӯ, қабул накардани Украина ба паймон қадами дуруст буд, зеро он ба ҷанги нав оварда мерасонид. Таъкид гардид, ки феълан Украина ҳам маблағ ва ҳам силоҳро аз ИМА ва Ғарб мегираду худаш на пул дорад, на саноати ҳарбӣ ва на иқтидори истеҳсолӣ.
Русия 24 феврали соли 2022 амалиёти вижаи низомӣ барои ҳимояи сокинони Донбассро эълон кард, ки ҳадафи онро ҳамчунин нозизудоӣ ва бартараф кардани таҳдидҳои амниятӣ арзёбӣ намуд.