ДУШАНБЕ, 13 июл — Sputnik. Омӯзгори тоҷик, директори "Литсей барои хонандагони болаёқат дар шаҳри Душанбе" Асҳобиддини Шералӣ сазовори унвони "Беҳтарин омӯзгори Иттиҳоди Давлатҳои Мустақил дар соли 2023" гардид.
Дар ин бора дафтари матбуоти сарраёсати маорифи шаҳри Душанбе хабар додааст.
Тибқи иттилои манбаъ, унвони мазкур барои фаъолияти сермаҳсул дар ҷодаи таълиму тарбияи насли наврас ва барои ноил гардидан ба дастовардҳои назарраси таълимю тарбиявӣ ва меҳнатӣ аз ҷониби Иттиҳодияи шахсони ҳуқуқии "Ҳаракати умумимиллии Бобек"-и Қазоқистон дар ҳамкорӣ бо Иттиҳоди Давлатҳои Мустақил ва Китобхонаи илмии электронии "eLIBRARY.RU"-и Русия дода шуд.
Ёдовар мешавем, ки қаблан дар шаҳри Тошканди Ӯзбекистон, дар озмуни байналмилалӣ омузгори тоҷик аз шаҳри Душанбе ғолиб омада буд, бо сертификат ва медали сарисинагӣ қадрдонӣ карда шуда буданд.
Чанде пеш дар озмуни ҳарсолаи кишварҳои узви Иттиҳоди Давлатҳои Мустақил беҳтарин донишҷӯён интихоб мешаванд, донишҷӯи тоҷик тавонист мақоми аввалро ба даст биёрад.
Додхудо Шарифзода, магистранти Академияи идоракунии давлатии назди президенти Тоҷикистон барандаи озмуни "Беҳтарин донишҷӯи ИДМ - 2023" гардид.
Маълум шуд, ки Додхудо соли сеюм аст, ки барои ба мусобиқа дохил шудан талош дошт ва баробари ба даст омадани шонс дарҳол ғолиб омад.