ДУШАНБЕ, 9 июл — Sputnik. Соли равон хоҷагиҳои моҳипарварӣ бояд 5100 тонна моҳии молӣ истеҳсол намоянд, иттилоъ додааст нашрияи "Ҷумҳурият" бо такя ба дурнамо.
Ба иттилои манбаъ, ин нишондод барои қонеъ кардани талаботи кишвар кофӣ нест ва зикр шудааст, ки мувофиқи қарори ҳукумат дар бораи меъёрҳои тавсиявии физиологии истеъмолии маҳсулоти асосии озуқаворӣ ба ҳар сари аҳолии Тоҷикистон талаботи ҳар сокини ҷумҳурӣ ба истеъмоли гӯшти моҳӣ 9 кило дар як сол мебошад.
Таъкид гардидааст, ки барои таъмини беш аз 10 млн аҳолӣ ҳудуди 90 ҳазор тонна моҳӣ бояд истеҳсол карда шавад.
Дар матлаб омадааст, ки ҳарчанд майдони ҳавзҳои моҳипарварӣ меафзояд, ҳосилнокӣ аз ҳар гектар ба талабот ҷавобгӯ нест.
"Солҳои 90-уми асри гузашта ҳосилнокӣ аз як гектар ҳавз 30-35 сентнерро ташкил медод. Айни замон бошад, ҳосилнокӣ аз як гектар ҳавз 15-16 сентнер аст", - омадааст дар матлаб.
Кфӣ набудани корҳои тадқиқотӣ, илмию озмоишӣ барои ҷорӣ кардани технологияҳои нав низ, аз мушкилоти соҳа арзёбӣ мешаванд. Гаронии ғизои воридотӣ, камбуди кадрҳо ва дигар омилҳо низ дар феҳрасти мушкилоти соҳа зикр шуданд.
Маврид ба зикр аст, ки ахиран раисҷумҳури Тоҷикистон, Эмомалӣ Раҳмон барои рушди соҳаи моҳипарварӣ дар шаҳри Хуҷанд ба рӯди Сир як млн дона моҳича сар дод.
Ба иттилои дафтари матбуоти раисҷумҳури Тоҷикистон, ҳоло дар ҳудуди вилояти Суғд 63 хоҷагии моҳипарварӣ ба қайд гирифта шудааст, ки масоҳати умумии ҳавзҳо барои парвариши моҳӣ 685 гектарро ташкил медиҳад.