ДУШАНБЕ, 10 июн — Sputnik. Маскав ҳоло сенарияеро тасаввур намекунад, ки кишварҳои Осиёи Марказӣ ба таҳримҳои Ғарб алайҳи Русия ҳамроҳ шаванд.
Ин нуктаро муовини вазири корҳои хориҷии Русия Михаил Галузин зимни суҳбат тариқи телевизионии "Россия 24" изҳор дошт.
"Ман итминон дорам, ки иттифоқчиён, шарикон ва дӯстони Осиёи Марказӣ аҳамияти афзалиятноки тамоми маҷмӯи муносибатҳо бо кишвари моро равшан дарк мекунанд", - таъкид кард ӯ.
Пас аз ин, дипломат ҷанбаи мустақими тиҷоративу иқтисодии ҳамкорӣ бо кишварҳои минтақаро қайд кард.
"Суде, ки аз пайвасти эҳтимолӣ ба таҳримҳо дар муқоиса бо талафоте, ки шикасти равобит бо Русия метавонад дар пай дошта бошад, ҳеҷ чиз аст", - гуфт Михаил Галузин.
Қаблан раиси ҷумҳури Русия, Владимир Путин гуфт, ки сиёсати боздошт ва заиф кардани кишвар стратегияи дарозмуддати Ғарб аст ва таҳримҳо ба тамоми иқтисоди ҷаҳонӣ зарбаи ҷиддӣ задаанд.
Ба фикри ӯ, мақсади асосии Ғарб бадтар кардани зиндагонии миллионҳо нафар мебошад.
Федератсияи Русия борҳо изҳор доштааст, ки кишвар бо фишори таҳримоте, ки Ғарб чанд сол пеш алайҳи Русия оғоз карду дар ҳоли афзоиш аст, мубориза хоҳад бурд.
Маскав қайд кард, ки Ғарб ҷуръати эътирофи нокомии таҳримҳо алайҳи Русияро надорад. Дар худи кишварҳои Ғарб ҳам дар бораи бетаъсир будани таҳримҳои зидди Русия фикру ақидаҳо борҳо шунида шудаанд.