ДУШАНБЕ, 29 май — Sputnik. Эмомалӣ Раҳмон, раисҷумҳури Тоҷикистон Раҷаб Тайиб Эрдуғонро бо интихоби дигарборааш ба вазифаи президентии Туркия табрик кард.
Тибқи иттилои дафтари матбуотии раисҷумҳури Тоҷикистон, Эмомалӣ Раҳмон дар паёмаш, пирӯзии Эрдуғонро натиҷаи сиёсати созандаи ӯ хондааст.
“Натиҷаҳои ин чорабинии муҳими сиёсӣ боз як далели эътимоди ҷомеаи Туркия ба Шумо ва аз ҷониби он ба таври васеъ дастгирӣ ёфтани сиёсати созандаатон мебошад, ки ба рушди пойдори кишвар ва таҳкими нуфузу эътибори он дар арсаи байналмилалӣ нигаронда шудааст", - изҳор дошт Раҳмон.
Ӯ дар идома ба раванди густариши робитаҳои анъанавии дӯстона ва ҳамкориҳои гуногунҷанбаи судманди Тоҷикистону Туркия таъкид кардааст.
Раисҷумҳури Тоҷикистон изҳори умедврӣ кардааст, ки дар давраи нави фаъолияти Эрдуғон муколамаи созандаи байнидавлатии ҷонибҳоро идома дода, ба нафъи ҳарду ҷониб муносибатҳоро ба сатҳи нав хоҳанд расонид.
Дар охир Эмомалӣ Раҳмон ба ҳамтои туркаш сиҳатмандии комил ва комёбиҳо ва ба мардуми Туркия сулҳу амонӣ ва шукуфоии бардавом орзу намудааст.
Ёдовар мешавем, ки даври дуюми интихоботи президентӣ дар Туркия шоми 28 май ба поён расид.
Тибқи эълони натоиҷи пешакӣ, Раҷаб Тайиб Эрдуғон беш аз 52%-и овозҳоро соҳиб шуда, ҳарифи ягонаи ӯ Камол Қиличдароғлу 47,91% ороро ба даст овард.