ДУШАНБЕ, 25 май — Sputnik. Дар мусобиқаи интихобии Ҷоми Осиё-2024 мунтахаби олимпии Тоҷикистон (U-23) дар гурӯҳи I бозӣ мекунад.
Дар ин бора, Федератсияи футболи ҷумҳурӣ хабар додааст. Ҳамин тавр, дастаҳои Австралия, Лаос ва Кореяи Шимолӣ рақибони Тоҷикистон хоҳанд шуд.
Кубок Азии 2024 жеребьевка
© ФФТ
Гуфта мешавад, мусобиқаи интихобӣ дар гурӯҳи I аз 6 то 12 сентябр дар шаҳри Душанбе баргузор мешавад.
Аз рӯи натиҷаи қуръакашӣ 43 даста ба 11 гурӯҳ тақсим шуданд. Ғолибон ва инчунин 4 дастаи беҳтарин дар байни ҷойҳои дуюм соҳиби роҳхатҳо ба финали Ҷоми Осиё-2024 мегарданд.
Интизор меравад, ки он соли 2024 дар Қатар баргузор шавад.
Қаблан сармураббии мунтахаби ҷавонони Тоҷикистон (U-17) Раҳматулло Фузайлов интизориҳои худро аз чемпионати ояндаи ҷавонони CAFA - 2023 баён карда буд.
Ба гуфтаи ӯ, ин мусобиқа охирин санҷиши қувва пеш аз чемпионати Осиё дар Таиланд хоҳад буд.
Ёдовар мешавем, ки чемпионати CAFA 2023 (U-20) байни ҷавонон аз 21 то 28 май дар шаҳрҳои Душанбе ва Турсунзода баргузор мешавад.
Дар ин мусобиқот мунтахаби Тоҷикистон бо тимҳои миллии Афғонистон - 22 май, Туркманистон - 24 май, Ӯзбекистон - 26 май ва Эрон - 28 май бозӣ мекунад.