ДУШАНБЕ, 24 май — Sputnik. Президенти Тоҷикистон, Эмомалӣ Раҳмон дар шаҳри Турсунзода корхонаи "Сипар гурӯҳ" - ро ба истифода дод.
Ба иттилои дафтари матбуоти раисҷумҳури Тоҷикистон, самти фаъолияти асосии "Сипар гурӯҳ" ба ҷамъу васлсозии мошинҳои махсуси ҳарбӣ ва гражданӣ равона гардидааст.
"Дар корхонаи навбунёд, ки дар ҳамкорӣ бо шарикони рушд таъсис ёфтааст, дар марҳилаи аввал бо ворид намудани қисмҳои алоҳида аз хориҷи мамлакат ҷамъу васли 17 намуд нақлиёти махсус ба роҳ монда шудааст ва оянда ин нишондод афзоиш дода мешавад", - омадааст дар иттилоия.
Тавзеҳ дода шуд, ки қисмҳои алоҳида барои омода намудани нақлиёти махсуси ҳарбӣ ва гражданӣ асосан аз ширкати "Streit Group" -и Амороти Муттаҳидаи Араб дастрас мегардад.
Иқтидори солонаи корхонаи нави саноатӣ ҷамъу васли 120 нақлиёт арзёбӣ мешавад ва дар оянда бо назардошти талабот ин рақам афзоиш хоҳад ёфт.
Манбаъ афзуд, мошинҳои омодашаванда дар ин корхона барои таъмини ҷузъу томҳои Қувваҳои мусаллаҳи Ҷумҳурии Тоҷикистон нигаронида шуда, дар оянда дар назар аст, содироти он ба кишварҳои хориҷ
Дар заминаи ба фаъолият оғоз намудани корхона дар шаҳри Турсунзода 100 нафар бо ҷои кор ва маоши хуб таъмин гардид, афзуд дафтари матбуоти раисҷумҳури Тоҷикистон.
"Дар асоси нақша кормандони корхона оянда аз ҷониби маъруфтарин ширкатҳои мошинсозии соҳавии кишварҳои пешрафта ба курсҳои кутоҳмуддати омӯзишии ҷамъу васлсозии ин намуди нақлиёт ҷалб карда мешаванд", - омадааст дар иттилоия.
Эмомалӣ Раҳмон бо раванди истеҳсолот ва санҷиши техникии аввалин мошинҳои дар ин корхона омодашуда шинос шуданд. Таъкид гардидаст, ки худравҳои мазкур ба талаботу меъёрҳои ҷаҳонии мошинсозӣ ҷавобгӯй мебошад.