ДУШАНБЕ, 17 май — Sputnik. Дар заминаи Корхонаи воҳиди давлатии "Фулузоти нодири Тоҷикистон", ки дар шаҳри Бӯстон ҷойгир аст, маркази муосири логистикӣ таъсис меёбад.
Дар ин бора дафтари матбуоти раиси вилояти Суғд хабар додааст.
Ба иттилои манбаъ, бо таъсиси ин маркази логистикӣ дар вилоят ҷойҳои нави корӣ ташкил карда мешавад.
“Маркази логистикӣ дар якҷоягӣ бо шарикони рушд аз Русия ташкил гардида, тавассути он ҳамлу нақли маҳсулот бо роҳи оҳан ва нақлиёти боркаш ба роҳ монда мешавад”, - қайд кардааст манбаъ.
Таъкид гардидааст, ки Маркази логистикӣ бо навтарин таҷҳизоту технологияҳо муҷаҳҳаз гардида, барои нигаҳдории маҳсулоти зудвайроншаванда дар ояндаи наздик насби яхдонҳои калон ба нақша гирифта шудааст.
Дар ҳамин ҳол, раиси вилояти Суғд Раҷаббой Аҳамадзода зимни сафари кориаш ба шаҳри Бӯстон аз ин марказ дидан кард ва гуфт ташкили чунин марказҳои логистикӣ ба манфиати кор аст.
Раиси вилояти Суғд барои татбиқи пурраи лоиҳа супоришҳои мушаххас додааст.