ДУШАНБЕ, 9 май — Sputnik. Таҳқиқи навори оташ гирифтани хонандаи мактаб муайян намуд, ки ҳодиса дар мактаби рақами 67-и ноҳияи Синои шаҳри Душанбе рух додааст.
Ба иттилои мақомоти умури дохилии Душанбе, маъмурини милиса баъди нашри навор дар шабакаҳои иҷтимоӣ ҳолатро мавриди санҷиш қарор доданд.
"Дар натиҷа муайян гардид, ки ҳодисаи мазкур санаи 6-уми майи соли ҷорӣ дар Муассисаи таҳсилоти миёнаи умумии рақами 67 ноҳияи Сино рух додааст", - омадааст дар иттилоия.
Таъкид шудааст, ки дар асоси нақша, дар муассисаи мазкур машқҳои мудофиаи гражданӣ ва омодагӣ ба ҳолатҳои фавқулодда гузаронида шудааст.
"Дар натиҷа аз ҷониби масъулин қоидаҳои бехатарӣ риоя карда намешавад, ки зимни оташсузӣ пушти бадани хонандаи синфи 10-уми муассисаи мазкур оташ гирифта, ҷароҳати ҷисмонӣ бардоштааст", - афзуд манбаъ.
Мақомоти умури дохилӣ илова намуданд, ки вобаста ба ҳолати мазкур, айни замон аз ҷониби кормандони милитсия маводҳои зарурӣ тартиб дода шуда, бо мақсади андешидани чораҳои дахлдори қонунӣ мавриди тафтишоти пешакӣ қарор дорад.
Дар наворе, ки ахиран дар шабакаҳои иҷтимоӣ паҳн гардид, либоси як наврасе оташ гирифта, се нафари низомипӯш ба кумаки ӯ мешитобанд, аммо муваффақ намешаванд ва дар ниҳоят худи хонанда даст меёбад, ки либоси сӯхтаро аз танаш канад.