ДУШАНБЕ, 7 май — Sputnik. Вазири умури хориҷии Чин, Тсин Ган ба вазири умури хориҷии толибҳо, Амирхон Муттақӣ пешниҳод кардааст, ки ҳамкориҳои сеҷонибаро бо ҳузури Покистон густариш диҳанд.
Ба иттилои Sputnik Афғонистон, Ган таҳкими ҳамкориҳоро ангезаи истиқрори субот ва шукуфоӣ дар минтақа арзёбӣ кардааст.
"Ҷониби Чин итминон дод, ки ҳамеша соҳибихтиёрӣ, истиқлолият ва тамомияти арзии Афғонистонро эҳтиром мекунад, вале хостори таъсиси ҳукумати фарогир бо намояндагии тамоми қавмҳою гуруҳҳои сиёсӣ мебошад", - гуфтаст дипломати баландпоя.
Чин ҳамчунин толибҳоро ба иҷрои ваъдаашон дар мубориза бо радикалҳо даъват карда, аз ин гуруҳ хостааст, аз сиёсати муътадил кор бигирад.
"Шумо бояд ба ваъдаи худ вафо кунед ва воқеан бо терроризм мубориза баред, ба террористон зарбаҳои қатъӣ занед", - гуфт вазири Чин ба Мутаққӣ.
Дар мавриди ҳамкориҳои дуҷониба, Пекин омода аст, ки муколамаро бо Кобул боз ҳам афзоиш диҳад, хабар медиҳад вазорати хориҷаи Чин.
Ахиран мулоқоти сеҷонибаи вазирони умури хориҷии толибҳо, Чин ва Покистон дар шаҳри Исломобод баргузор шуд.
Сафари Муттақӣ ба Исломобод аз ҳисоби Покистон бо иҷозати Шӯрои амнияти Созмони Милали Муттаҳид сурат гирифт, чунин ин гуруҳ ва мақомдорони баландпояи он таҳти таҳримоти ин созмони байналмилалӣ қарор доранд.