ДУШАНБЕ, 29 апр — Sputnik. Санаи 15 май дар вилояти Суғд Рӯзи байналмилалии оила ҷашн гирифта мешавад, иттилоъ додааст дафтари матбуоти раиси вилояти Суғд.
Ба иттилои манбаъ ахиран дар ин бора қарори марбутаи Раиси вилояти Суғд Раҷаббой Аҳмадзода ба имзо расид.
Дар доираи баргузории Рӯзи байналмилалии оила ташкили суҳбату вохӯриҳо бо иштироки оилаҳои намунавӣ, соҳибтаҷриба ва ҷавон дар муассисаҳои таҳсилоти олӣ, миёнаи касбӣ ва умумӣ, озмуни иншои беҳтарин дар мавзӯи "Оилаи мо беҳтарин" байни хонандагони муассисаҳои таҳсилоти миёнаи умумӣ баргузор мегардад.
Ҳамзамон қайд карда шудааст дар ин рӯз озмуну маҳфилҳои гуногун, тарғиби ташаккули тарзи ҳаёти солим, силсилаи семинар-машваратҳо дар мавзӯи "Оилаи солим — ҷомеаи устувор" ба нақша гирифта шудааст.
Тибқи қарор раёсатҳои кор бо занон ва оила, фарҳангу ҷавонон ва варзиш, маорифу тандурустӣ ва мақомоти иҷроияи ҳокимияти давлатии шаҳру ноҳияҳо ҷиҳати дар сатҳи баланд таҷлили намудани Рӯзи оила вазифадор гардидаанд.