ДУШАНБЕ, 28 апр — Sputnik. Дар Тоҷикистон чун ҳамасола ҷашни варзишии —Дави миллӣ ва марафони велосипедронӣ доир мегардад.
Дар ин бора дафтари матбуотии Кумитаи ҷавонон, варзиши кишвар хабар медиҳад.
Ба иттилои манбаъ, чорабиниҳои варзишӣ дар доираи Рӯзҳои ҷавонон рӯзи якшанбеи 21 май баргузор мегарданд, ки ҳамасола 23 май дар ҷумҳурӣ таҷлил мешавад.
Ҳамин тариқ, субҳи ин рӯз нахуст марафони велосипедронӣ доир мешавад ва соати 07:30 баргузории дави миллӣ дар назар аст.
Иштирокчиёни дави миллиро мебояд дар тамоми манотиқи ҷумҳурӣ масофаи 3,5 ё 10 км роҳро тай намоянд.
Дар пойтахт варзишгарон давиданро аз Чорбоғ шурӯъ карда тавассути кӯчаҳои Карамов-хиёбони Ҳофизи Шерозӣ то Муассисаи давлатии “Наврӯзгоҳ”-и шаҳри Душанбе идома медиҳанд.
Нафароне, ки аввалин шуда ба хатти марра мерасанд бо мукофоту ифтихорномаҳо қадрдонӣ карда мешаванд.
Дар Дави миллӣ чун анъана ҳамаи табақаҳои ҷомеа, аз ҷумла намояндагони мақомотҳои давлатӣ, идораҳо, ширкатҳои хусуӣ ва созмонҳои байналмиллалӣ иштирок хоҳанд кард.
Ёдовар мешавем, ки ин чорабинӣ ҳамасола дар якшанбеи сеюми моҳи май дар асоси фармони раисҷумҳури кишвар “Дар бораи Рӯзи дави миллӣ” сар аз соли 2007 баргузор мешавад.