ДУШАНБЕ, 27 апр — Sputnik. Раисҷумҳури Тоҷикистон Эмомалӣ Раҳмон дар дидор бо муовини раиси ҳукумат, вазири саноат ва тиҷорати Русия Денис Мантуров масоили мухталифи шарикии стратегии ду давлатро баррасӣ намуданд.
Дар ин бора дафтари матбуоти раисҷумҳури кишвар хабар додааст.
Тибқи иттилои манбаъ, зимни мулоқот аз ҷумла ҳамкорӣ дар бахши саноат мавриди баррасӣ қарор гирифт.
Кишвардори Тоҷикистон дар мулоқот бо муовини раиси ҳукумат, вазири саноат ва тиҷорати Русия аз сатҳи ҳамкории дуҷонибаи Тоҷикистону Русия, инчунин равобити ду кишвар дар чаҳорчӯби созмонҳои байналмилалӣ ва минтақавӣ изҳори қаноатмандӣ кард.
Қайд гардидааст, ки ҷонибҳо зимни мулоқот маҷмуи васеи масоили муносибатҳои давлатҳоро дар самтҳои ояндадори тиҷоратию иқтисодӣ, бахусус саноат ва татбиқи лоиҳаҳои калони сармоягузорӣ, ҳамкории фаъол тавассути таъсиси паркҳои саноатӣ дар минтақаҳои озоди иқтисодӣ муҳокима карданд.
“Ҳамкорӣ дар бахши саноати маъдантозакунӣ, металлургия, коркарди нафт, техникаи электронӣ, саноати нассоҷӣ, хӯрокворӣ, фарматсевтӣ ва истеҳсоли масолеҳи сохтмонӣ аз самтҳои ояндадору судовари робитаҳо номида шуд”, - таъкид кардааст дафтари матбуоти раисҷумҳур.
Ҳамчунин роҳбари давлат дар ин дидор таъсиси корхонаҳои муштараки саноати бофандагӣ, ташкили занҷираи ягонаи истеҳсолӣ, рушди бахши коркарди пахта, пӯст ва пашм бо ҷалби сармоя ва технологияи Русия зарур шумурда шуд.
Зикр гардидааст, ки дар мулоқот ҷонибҳо инчунин дар бораи дигар мавзуъҳои мавриди таваҷҷуҳ гуфтугӯи судманд карданд.