ДУШАНБЕ, 21 апр — Sputnik. Вазорати маориф ва илми Русия шаклҳои нави ҳузури таҳсилоти кишварро дар хориҷа таҳия мекунад, гуфт муовини вазири маориф, Константин Могилевский.
Тавре вай тавзеҳ дод, содироти таълим на танҳо дар шакли классикии филиалҳои муассисаҳои таҳсилоти олии касбӣ, балки дар шаклҳои куллан нав низ ба нақша гирифта шудааст.
"Дар охири моҳи май мо нақша дорем, ки шеваҳои навро дар ҳукумат дифоъ карда, ба татбиқи онҳо шурӯъ кунем", - таъкид кард муовини вазир.
Самти дигар, такмили низоми квота барои таҳсили донишҷӯёни хориҷӣ дар Русия муаррифӣ шуд. Могилевский гуфт, ки дар ин самт барои баланд бардоштани сифати интихоби донишҷӯён кор бурда мешавад.
Ин дар ҳолест, ки таваҷҷуҳ ба таҳсил дар Русия миёни довталабон аз кишварҳои Иттиҳоди Давлатҳои Мустақил зиёд мебошад.
Вазорати маориф ва илми Русия тасмим гирифтааст, ки дар соли оянда теъдоди квотаҳои ҷойҳои буҷавӣ дар донишгоҳҳоро барои донишҷӯёни хориҷӣ ҳифз намояд.
Вазири маориф ва илми Русия, Валерий Фалков, ахиран иттилоъ дод, ки дар соли 2024 ҳамон миқдори квотаҳое, ки дар соли 2023 ба донишҷӯёни хориҷӣ барои таҳсил дар донишгоҳои Русия ҷудо шуда буд, боқӣ мемонад.
Ба гуфтаи ин вазорат, дар соли равон барои таҳсили шаҳрвандони хориҷӣ тибқи квотаи ҳукумати Русия 30 ҳазор ҷой ҷудо шудааст. Дар маҷмуъ шумораи донишҷӯёни хориҷӣ дар Русия қариб 400 ҳазор нафар арзёбӣ мешавад.