ДУШАНБЕ, 13 апр — Sputnik. Дар вилояти Хатлон ду корманди давлатӣ бо иттиҳоми фасоди молӣ боздошт шудааст.
Тибқи гузориши телевизионии ВКД, кирдори ҷиноятии ду фарди мансабдорро кормандони Раёсати мубориза бар зидди ҷиноятҳои мутташакили ин ниҳод дар вилоят ошкор кардаанд.
Ба иттилои манбаъ, дастгиршудаҳо раиси ҷамоати деҳоти ба номи Холматови ноҳияи Шаҳритус Т.М. ва мутахассиси бахши меъмории ин ноҳия Т.Э. мебошанд
Номбурдагон барои ҷудо намудани 10 сотиқ замин ба як сокини ноҳияи Қубодиён аз ӯ 30 ҳазор сомонӣ талаб карда, гирифтанд, афзудааст манбаъ.
Гуфта мешавад, ки баъди гирифтани пулҳо, мақомот дар бинои ҷамоат 25 ҳазор сомониро аз раиси ҷамоат ва 5 ҳазори дигарро аз мутахассиси бахши меъмории ноҳия гиритфтаанд.
Мақомот мегӯяд, пулҳо қаблан нишонагузорӣ шуда буд ва ҳамакнун ҳамчун далели шайъӣ истифода мешавад.
Раиси ҷамоат зимни бозпурсӣ гуфт, ки дар маслиҳати пешакӣ бо шарикаш қисме аз маблағро пеш аз ҷашни Наврӯз ва боқимондаашро ҳамакнун гирифтааст, ки ба дасти мақомот меафтад.
Феълан, Прокуратураи вилояти Хатлон нисбати онҳо тибқи моддаи 319 қисми 4 Кодекси ҷиноятӣ парвандаи ҷиноӣ боз шуда, гумонбарон ба ҳабси пешакӣ гирифта шудаанд.
Маврид ба зикр аст, ки ин банди қонуни ҷиноии кишвар ба муттаҳамон маҳрум сохтан аз озодӣ ба муҳлати аз ҳафт то дувоздаҳ солро пешбинӣ мекунад.
Ин нахустин ҳолати дастгир шудани мансабдорон набуда, дар гузашта низ бозҳо Оҷонсии зиди фасод аз ҷунин боздоштҳо хабар дода буд.