ДУШАНБЕ, 3 мар — Sputnik. Миёни Тоҷикистону Русия 9 санади ҳамкорӣ ба имзо расиданд, ки аз маориф то тиб, нафақа ва сайёҳиро фаро мегиранд. Маросими имзо дар ҳузури сарвазирони Тоҷикистону Русия, Қоҳир Расулзода ва Михаил Мишустин баргузор гардид.
Дафтари матбуоти ҳукумати Русия аз ҷумла созишнома миёни вазоратҳои молияи ду кишварро зикр намудаст, ки марбути расондани кумаки техникӣ ба Тоҷикистон барои такмилу маъмурисозии андоз мебошад.
Созишнома байни ҳукуматҳо дар бораи ҳамкорӣ дар соҳаи тандурустӣ, таҳсил ва илми тиб аз санадҳои дигари имзошуда мебошад.
Душанбе ва Маскав ҳамчунин барои ҳамкорӣ дар соҳаи таъмини некӯаҳволии санитарию эпидемиологии аҳолӣ созиш намуданд.
Созишнома байни ҳукуматҳои Русия ва Тоҷикистон дар бораи истифодаи мутақобилаи системаҳои электронии сертификатсияи истеҳсоли мол низ аз ҷониби роҳбарони мақомоти гумруки ду кишвар имзо гардиданд.
Санади дигар заминаи ҳуқуқӣ барои эътирофи мутақобилаи унвону дараҷаҳои илмӣ миёни Тоҷикистону Русия аст.
Созишномаи дигари маъмурӣ байни Вазорати меҳнат ва ҳифзи иҷтимоии аҳолии Русия ва Агентии суғуртаи иҷтимоӣ ва нафақаи Тоҷикистон дар бораи татбиқи созишномаи қаблан имзогардида дар соҳаи нафақа мебошад.
Харитаи роҳ дар бахши сайёҳӣ, нақшаи ҳамкориҳои муштарак дар соҳаи саноат, Барномаи ҳамкориҳои варзишӣ барои солҳои 2023-2025 аз санадҳои дигари имзогардида миёни Тоҷикистону Русия мебошанд.