ДУШАНБЕ, 23 фев — Sputnik. Дар Вилояти Мухтори Кӯҳистони Бадахшон ба 66 хонавода кумаки ирсолнамудаи роҳбари давлат тақсим карда шуд. Дар ин бора Вазорати ҳолатҳои фавқулода хабар дод.
"Кумакҳо аз 25 номгӯ дар ҳаҷми 40 тонна буда, аз сару либоси зисмистона, пойафзол, маводи ғизоӣ, бухориҳои чӯянӣ, катҳои хоб бо ҳама лавозимоташон иборат мебошад", - омадааст дар хабари КҲФ.
Ба иттилои манбаъ, сокинон кумаки роҳбари давлатро аз назди Мактаби президентӣ дар шаҳри Хоруғ қабул карданд.
Манбаъ меафзояд, кумакҳо бо иштироки хабарнигорон ва ҳамчунин Комиссияи махсусе, ки бо дастури сарвазир таъсис дода шуд, ба хонаводаҳои аз офати табиӣ зарардида тақсим гардиданд.
Маврид ба зикр аст, ки аз офатҳои табиии ахир бештар аз ҳама сокинони ноҳияҳои Ванҷ, Дарвоз, Рӯшон, Шуғнон, Роштқалъа ва шаҳри Хоруғ зарар диданд.
Танҳо дар шаҳри Хоруғ беш аз даҳ нафар қурбони тармафароӣ шуда, сокинони зиёд бехонаву дар монданд.
Тибқи маълумоти ахир, бар асари тармафароӣ дар Тоҷикистон 18 нафар кушта шуданд, ки аксари онҳоро сокинони ВМКБ ташкил медиҳанд.