ДУШАНБЕ, 8 фев — Sputnik. Масъалаи ирсоли кумаки аввалия ба осебдидагони зилзилаи ахир дар Туркия дар мулоқоти роҳбарияти Вазорати корҳои хориҷии Тоҷикистон ва Кумитаи ҳолатҳои фавқулода ва мудофиаи граждании кишвар бо Сафири Туркия дар Тоҷикистон баррасӣ шуд, иттилоъ додааст Вазорати умури хориҷа.
Бино бар иттилои манбаъ зимни мулоқот ҷониби Тоҷикистон бори дигар ҳамдардии амиқи хешро бино бар заминларзаи шадид дар минтақаи ҷанубу шарқи кишвари дӯсти Туркия, ки боиси ҳалокати теъдоди зиёди шаҳрвандон ва хисороти бузурги моддӣ гардид, баён кард.
Дар мулоқот омодагии Ҳукумати Тоҷикистон барои сафарбар намудани гурӯҳи ҳирфаии ҷустуҷӯӣ-наҷотдиҳии Кумитаи ҳолатҳои фавқулода ва мудофиаи граждании Тоҷикистон барои бартарафсозии оқибатҳои заминларзаи мазкур, инчунин расонидани кумаки башардӯстона иборат аз маводи аввалияи зарурӣ иброз гардид.
Дар ҳамин ҳол, бино ба иттилои Сафорати Тоҷикистон дар Анкара, ҳоло аз ҷониби мақомоти расмии Туркия дар бораи ҳалок ва захмӣ шудани шаҳрвандони Тоҷикистон бар асари ин заминларза маълумот ворид нашудааст.
Қайд карда шудааст, ки намояндагиҳои дипломатии Тоҷикистон дар Туркия барои тамоси доимӣ бо шаҳрвандони Тоҷикистон, ки дар минтақаҳои Каҳраманмараш, Ҳатай, Османия, Адияман, Газиантеп, Шанлиурфа, Диярбакир, Малатия ва Адана қарор доранд, телефонҳои шабонарӯзиро фаъол намудааст.